Teknologjia për krijimin e dhëmbëve në laborator mund të bëhet realitet brenda 20 vjetëve

Shkencëtarët kanë arritur të krijojnë dhëmbë të ngjashëm me ata të njeriut në eksperimente me derra dhe besojnë se në të ardhmen do të jetë e mundur të krijohen dhëmbë të rinj në laborator për përdorim njerëzor, ka raportuar The Telegraph.

Ekspertët e Universitetit "Tufts" në SHBA kanë zhvilluar një studim të avancuar duke përdorur qeliza nga dhëmbët e njerëzve dhe derrave. Këto qeliza u kombinuan dhe u rritën në laborator për të formuar inde dentare.

Dhëmbët e krijuar u implantuan në gojën e derrave dhe vazhduan të rriteshin, megjithëse nuk kishin formën dhe madhësinë perfekte. Megjithatë, rezultati përfundimtar i ngjante një dhëmbi natyral, çka është një hap i rëndësishëm në fushën e inxhinierisë dentare.

Profesoresha Pamela Yelick, e cila drejtoi studimin, ka thënë se është optimiste për të ardhmen e kësaj teknologjie.

“Jam 100% e sigurt se rigjenerimi i dhëmbëve njerëzorë është i mundur. Besoj se mund ta arrijmë këtë gjatë jetës sime, dhe unë jam në mes të të 60-ave”, ka deklaruar ajo në konferencën e Shoqatës Amerikane për Avancimin e Shkencës (AAAS) në Boston.

Ajo ka theksuar se përparimet e shumta në teknologji, inxhinieri të indeve, mjekësi rigjeneruese dhe stomatologji po ndikojnë në njëra-tjetrën, duke e afruar gjithnjë e më shumë këtë inovacion drejt realizimit.