Studimi: Përjetimi i emocioneve të mëdha bashkë me dikë i lidh njerëzit më shumë

Studimi i ri ka theksuar një aspekt interesant të lidhjes njerëzore përmes përvojave emocionale. 
Sipas studimit, ndjekja e filmave së bashku mund t’i afrojë njerëzit më shumë për ndjenjat, sidomos kur bëhet fjalë për momente me emocione më të theksuara. 

Duke u fokusuar te çifte të panjohurish, studiuesit treguan se dëgjimi i përmbajtjeve emocionale, qoftë të gëzueshme ose shqetësuese, mund të sjellë një ndjenjë më të madhe lidhjeje mes vete. Kjo është edhe më shumë e theksuar kur individët janë afër dhe mund ta shohin njëri-tjetrin, shkruan The Guardian.

Eksperimenti, i cili përfshinte matje fizike përveç emocioneve të raportuara, ofron pamje të plotë të mënyrës se si këto përvoja të përbashkëta ndikojnë në përgjigjet emocionale.

Gjetja kryesore e këtij studimi është se ndjenja e lidhjes rritej kur pjesëmarrësit mund të shihnin njëri-tjetrin, gjë që tregon se dukshmëria ka rol të rëndësishëm në forcimin e lidhjeve edhe pa komunikim verbal.

Victor Chung, autor i studimit që u bë në institucionin arsimor “Ecole Normale Supérieure” në Francë, ka sugjeruar se po që se ndahen përvojat emocionale me të tjerët, madje edhe me të panjohur, ato kontribuojnë në formimin e marrëdhënieve sociale. Ani pse studimi nuk ka dhënë prova përfundimtare se emocionet e theksuara krijojnë lidhje, ai ka hapur mundësi për hulumtime të mëtutjeshme mbi kontekstet e ndryshme emocionale dhe se si mund të ndikojnë në lidhjet ndërpersonale.

“Kemi gjetur se ndjekja e filmave emocionalë së bashku, mund të krijojë lidhje më të fortë sociale edhe kur personi i dytë mund të jetë i panjohur e të mos flasësh fare me të”, ka thënë Chung.

Në përgjithësi, ky studim ka theksuar rëndësinë e përvojave emocionale në formimin e lidhjeve sociale, duke rikujtuar se njerëzit janë të lidhur me njëri-tjetrin përmes përvojave të përbashkëta.