-
Përktheu:
Vita Abrashi-Kajtazi
- 7 janar 2025 13:32
- Shpërndaje në:
Sipas një studimi të ri që është testuar në kushte reale, përdorimi i Inteligjencës Artificiale (AI) për skanim të kancerit të gjirit ka treguar se rrit mundësinë e zbulimit të sëmundjes.
Studimi, i botuar në revistën Nature Medicine, analizoi të dhënat nga një program i skanimit për kancerin e gjirit në Gjermani, dhe gjeti se AI-ja mund të përmirësojë ndjeshëm zbulimin e kancerit pa shkaktuar më shumë diagnoza të gabuara.
Në studim, 461,818 gra morën pjesë në skanim për kancerin e gjirit mes muajit korrik të 2021 dhe muajit shkurt të vitit 2023. Nga këto, 260,739 gra kishin mamogramet e tyre të vlerësuara nga dy radiologë, por për disa, njëri prej radiologëve përdori një mjet AI si mbështetje. Ky mjet AI vepron si një “rrjet sigurie”, duke treguar skanimet që ai i konsideron si të dyshimta edhe nëse një radiolog i ka vlerësuar si normale, duke ofruar ndihmë shtesë në interpretimin e këtyre skanimeve, shkruan The Guardian.
Rezultatet ishin shumë premtuese. Në përgjithësi, grupi që përdori AI-në kishte një rritje prej 6.7% të nivelit të zbulimit të kancerit të gjirit. Pas përshtatjes së rezultateve për faktorë të tjerë si mosha dhe përvoja e radiologëve, diferenca e zbulimit të kancerit u rrit në 17.6% më shumë raste të zbuluara për çdo 1,000 gra të skanuara në grupin që përdori AI-në. Kjo do të thotë se për çdo 1,000 gra të skanuara, një rast shtesë kanceri u zbulua falë përdorimit të AI-së.
Është shumë e rëndësishme që studimi ka treguar se përdorimi i AI-së nuk ka çuar në më shumë gra që janë rikthyer për hulumtime të mëtejshme për shkak të një skanimi të dyshimtë. Shkalla e diagnozave të gabuara, kur gratë kërkohen të kthehen për teste shtesë pa pasur kancer, ishte e ngjashme midis grupit që përdori AI-në dhe grupit që përdori metodën tradicionale. Kjo tregon se AI-ja mund të rrisë mundësinë e zbulimit të kancerit pa shkaktuar më shumë dëme për gratë dhe pa shtuar testet e panevojshme.
“Ne mund të përmirësojmë shkallën e zbulimit pa rritur dëmin për gratë që marrin pjesë në skriningun për kancerin e gjirit”, ka shpjeguar profesori Alexander Katalinic, autor i studimit.
Katalinic gjithashtu ka theksuar se ky mjet mund të zvogëlojë ngarkesën për radiologët.
Mjeti AI aktivizoi “rrjetin e sigurisë” 3,959 herë në grupin që përdori AI-në, dhe çoi në 204 diagnoza të kancerit të gjirit. Nga ana tjetër, 20 diagnoza të kancerit do të ishin humbur në grupin me AI nëse nuk do të ishin shqyrtuar skanimet që AI-ja i konsideroi si normale. Teknologjia gjithashtu përshpejtoi procesin e shqyrtimit të skanimeve, duke mundësuar ulje të ngarkesës për radiologët.
Megjithatë, disa ekspertë mbeten të kujdesshëm. Doktoresha Kristina Lang nga Universiteti i Lundit ka shpjeguar se rritja e numrit të rasteve me qeliza të kancerit që njihen si “in situ” (ato që rriten ngadalë dhe mund të mos jenë shumë të rrezikshme) ngrit shqetësime për diagnostikim të gabuar.
Ajo ka theksuar se “duhen ndjekur rezultatet afatgjata për të kuptuar plotësisht pasojat klinike të integrimit të AI-së në skanimin për mamografi”.
Doktoresha Katharine Halliday, presidentja e Royal Collage of Radiologists, ka thënë se çdo mjet që mund të përmirësojë saktësinë dhe produktivitetin e radiologëve është i mirëpritur.
Megjithatë, ajo ka shtuar se është e nevojshme që përdorimi i AI-së në shëndetësinë publike të bëhet me kujdes dhe nën mbikëqyrje të ekspertëve për të minimizuar rreziqet e mundshme.
Ky studim sugjeron se AI-ja mund të luajë rol të rëndësishëm në përmirësimin e zbulimit të kancerit të gjirit, sidomos në sisteme shëndetësore të ngarkuara, duke lehtësuar punën e radiologëve.
Sidoqoftë, kërkohen më shumë studime për të siguruar përfitimet afatgjata klinike dhe për të adresuar shqetësimet për diagnozë të gabuar.
