Ilaçi Donanemab i kompanisë farmaceutike amerikane “Eli Lilly”, kundër sëmundjes së Alzheimerit, ka fituar mbështetjen e këshilltarëve federalë të shëndetit dhe pritet të fitojë miratimin e përdorimit të tij për pacientët e prekur nga sëmundja që shkakton demencë, dhe probleme me kujtesën.
Këshilltarët e Agjencisë së Ushqimit dhe Barnave të Shteteve të Bashkuara (FDA), kanë votuar njëzëri pro ilaçit, i cili thuhet se ka aftësi që të ngadalësojë zhvillimin e sëmundjes.
FDA-ja, pritet të marrë vendimin përfundimtar për miratimin e ilaçit këtë vit, raporton “Associated Press”.
Nëse agjencia pajtohet me rekomandimin e panelit, ilaçi, Donanemab, i bie të jetë i dyti kundër sëmundjes së Alzheimerit, i miratuar në SHBA, që thuhet se ngadalëson bindshëm dobësimin e aftësive kognitive dhe problemet e kujtesës.
FDA-ja e pati miratuar një ilaç të ngjashëm, në formë injeksioni, të quajtur Leqembi, nga prodhuesi japonez “Eisai”, vitin e kaluar.
Efekti i ngadalësimit të zhvillimit të sëmundjes me përdorimin e të dy ilaçeve mund të vërehet pas përdorimit disa mujor të tyre.
Në përgjithësi, të dy ilaçet, pas studimeve, rezultojnë në një ngadalësim modest të problemeve kognitive te pacientët me Alzheimer, në fazën e hershme të tij.
Kompania farmaceutike, “Eli Lilly”, me bazë në Indianapolis, kreu një studim me 1.700 pacientë dhe zhvillimi i sëmundjes së atyre të cilëve morën infuzione intro venoze mujore të ilaçit, Donanemab, ra me rreth 35%.
Çështja kryesore e sigurisë me Donanemab-in, ishte ënjtja dhe gjakderdhja në tru, një problem i zakonshëm për të gjitha barnat që synojnë amiloidin, proteinën jonormale depozitat, e së cilës mund të dëmtojnë organet dhe të shkaktojnë dështimin e tyre. Shumica e rasteve të identifikuara në studimin e “Lilly” ishin të lehta.
Tri vdekje u shkaktuan gjatë studimit të ilaçit, sipas FDA-së, dhe të gjitha përfshinin ënjtje të trurit ose gjakderdhje. Një nga vdekjet u shkaktua nga goditja në tru, e cila është kërcënim për jetën e që ndodh më shpesh te pacientët me Alzheimer.
Paneli i FDA-së, ra dakord që ato rreziqe mund të adresohen me etiketa paralajmëruese dhe edukim për mjekët, si dhe skanime mjekësore për të identifikuar pacientët me rrezik më të madh për goditje në tru.
