-
Përktheu:
Vita Abrashi-Kajtazi
- 7 shkurt 2025 10:40
- Shpërndaje në:
Një studim i ri ka treguar se edhe ekspozimi i shkurtër ndaj ajrit të ndotur ka ndikim të dukshëm në aftësinë e njeriut për t'u përqendruar dhe për të njohur emocionet e të tjerëve.
The Guardian ka raportuar se gjatë studimit, 26 pjesëmarrës u ekspozuan për një orë ndaj niveleve të larta të ndotjes nga pluhuri i imët (PM) që vinte nga tymi i një qiriu, si dhe ekspozimi ndaj ajrit të pastër, po ashtu për një orë.
Rezultatet kanë treguan se pas ekspozimit në ajër të ndotur, ata kishin vështirësi në përqendrim dhe kishin probleme në njohjen e emocioneve të fytyrave (si frikë ose lumturi).
Kjo gjë mund të ketë ndikime të rëndësishme në jetën e përditshme, duke i bërë individët më të prirur për t’u shpërqendruar gjatë aktiviteteve të zakonshme si blerjet në supermarket, ku mund të jenë më të prirur për të bërë blerje impulsive. Po ashtu, mund të ndikojë edhe në mënyrën se si njerëzit reagojnë ndaj emocioneve të të tjerëve, gjë që mund të ndikojë në marrëdhëniet sociale.
Ndikimi i ajrit të ndotur nuk ishte i njëjtë për të gjitha funksionet e trurit.
Pjesëmarrësit në studim nuk shfaqën rënie në funksionet e kujtesës, që do të thotë se disa aspekte të trurit mund të jenë më të qëndrueshme ndaj ndotjes së përkohshme.
Ky studim ka rëndësi të madhe, pasi ajri i ndotur është një nga rreziqet më të mëdha për shëndetin publik në mbarë botën dhe shkakton çdo vit miliona vdekje të parakohshme.
Rezultatet e studimit mund të kenë ndikime të mëdha jo vetëm në shëndetin e individëve, por edhe në produktivitetin e punës dhe arritjet e studentëve.
Në veçanti, studimi mund të ndihmojë në hartimin e politikave më efektive për të luftuar ndotjen e ajrit, duke u fokusuar në burime të veçanta të ndotjes si tymi nga gatimi, djegia e drurit dhe lëndët kimike nga pastruesit e shtëpisë.
Kjo mund të çojë në krijimin e ligjeve që mbrojnë më mirë shëndetin publik dhe përmirësojnë cilësinë e ajrit në qytetet e mëdha, ku ndotja është shqetësim i madh.
Në këtë kuadër, qytetet mund të përfshihen në masat për reduktimin e ndotjes dhe përmirësimin e kushteve të jetesës për banorët e tyre.
Pjesëmarrësit në studim dhe qytetarët e qyteteve do të përfitonin nëse më shumë burime do të drejtoheshin drejt reduktimit të ndotjes për të mbrojtur shëndetin mendor dhe fizik.
