Në letrën konfidenciale me të cilën drejtoresha e Muzeut të Louvreit, Laurence Des Cars, i drejtohet Ministrisë së Kulturës, ajo kërkon ndërhyrje të menjëhershme në përmirësimin e kushteve. Sipas saj, disa nuk janë më rezistente ndaj ujit dhe lagështisë, ndërsa hapësira të tjera përballen me luhatje të ndryshimeve të temperaturës, duke rrezikuar ruajtjen e veprave“
Drejtoresha e Muzeut të Louvreit në Paris, Laurence Des Cars, ka paralajmëruar Qeverinë e Francës për gjendjen e këtij institucioni, duke treguar nevojën për ndërhyrje të mëdha, ka shkruar ajo në një letër konfidenciale të siguruar nga mediat. Në njoftimin të cilin ajo ia ka adresuar para dhjetë ditësh ministres së Kulturës të Francës, Rachidi Dati, shkruan për “gjendjen e vështirë të objektit të muzeut më të vizituar në botë” në të cilin shumë gjëra kanë arritur “në nivel alarmues të vjetrimit”, ka raportuar gazeta “Le Parisien”.
Dokumenti, pjesë të të cilit janë publikuar në gazetë, nënvizon për gjendjen shumë të keqe të hapësirave muzeale. Disa nuk janë më rezistente ndaj ujit dhe lagështisë, ndërsa hapësira të tjera përballen me luhatje të ndryshimeve të temperaturës “duke rrezikuar ruajtjen e veprave“. Një tjetër problem është fakti se vizitorët e Louvreit janë të privuar prej hapësirës që “u ofron pushim”.
“Furnizimi me ushqim dhe nyjat sanitare janë të pamjaftueshme, shumë nën standardet ndërkombëtare. Sinjalizimi duhet të ridizajnohet në tërësi”, shkruhet në dokument.
Gazeta “Le Parisien” ka raportuar edhe për “mangësi me peshë” të strukturës të madhe si piramida prej xhami, e hapur ne 1988, e që është “shumë jomikpritëse” në ditët me vapë.
Në njoftimin e drejtoreshës shkruhet po ashtu për nevojën që të shqyrtohet “ekspozimi i Mona Lizës në Salle des Estates”.
Në prill të vitit të kaluar, Laurence Des Cars kishte njoftuar tashmë se po mendonte për përmirësimin e kushteve të ekspozimit të pikturës së famshme të Leonardo da Vincit, për të cilën ajo kishte thënë se meriton një dhomë të veçantë.
Në mesin e projekteve të paralajmëruara është hapja e një hyrjeje të dytë në muze për ta “çliruar“ hyrjen kryesore, e cila ndodhet nën piramidë. Ishte projektuar për të akomoduar katër deri në pesë milionë vizitorë në vit. Muzeu i Luvreit vitin e kaluar pati nëntë milionë vizitorë.
