Arkeologët zbulojnë varrin e faraonit të panjohur në Egjipt

Zbulimi i varrit, që ndodhet shtatë metra nën sipërfaqen e tokës në nekropolin e lashtë të Malit Anubis, u njoftua nga Muzeu i Universitetit të Pensilvanisë dhe nga arkeologët egjiptianë. Ky përbën zbulimin e dytë të këtij viti të një varri të një mbreti të lashtë egjiptian

Arkeologët kanë zbuluar një dhomë varri të madhe prej guri të një faraoni të panjohur egjiptian afër qytetit të Abydos, që daton rreth 3600 vjet më parë, gjatë një periudhe të çrregullt në historinë e Egjiptit.

Zbulimi i varrit, që ndodhet shtatë metra nën sipërfaqen e tokës në nekropolin e lashtë të Malit Anubis, u njoftua nga Muzeu i Universitetit të Pensilvanisë dhe nga arkeologët egjiptianë. Ky përbën zbulimin e dytë të këtij viti të një varri të një mbreti të lashtë egjiptian.

Dhoma e varrit e zbuluar në janar në Abydos, një qytet i rëndësishëm i Egjiptit të lashtë, i vendosur rreth 10 kilometra nga lumi Nil, ishte bosh, dukshëm e grabitur nga hajdutët e varreve që herët. Emri i mbretit që ka qenë varrosur brenda është regjistruar fillimisht në tekstet hieroglifike mbi tulla të mbuluara me llaç në hyrje të dhomës së varrit, bashkë me skena të pikturuara që tregojnë hyjnitë Isis dhe Nephthys.

“Emri i tij ishte në shkrime, por nuk ka mbijetuar nga dëmtimet e bëra nga grabitësit e varreve të lashta. Disa kandidatë përfshijnë mbretër të quajtur Senaiib dhe Paentjeni, të cilët i njohim nga monumentet në Abydos, - ata kanë sunduar në këtë periudhë - por varret e tyre ende nuk janë gjetur”, tregoi Josef Wegner, profesor i arkeologjisë egjiptiane në Universitetin e Pensilvanisë, njëri prej udhëheqësve të gërmimeve.

Përveç hyrjes të zbukuruar, dhoma e varrit kishte një seri dhomash të tjera me arka pesë metra të larta, të formuara nga tulla balte.

Varri daton në një periudhë të njohur si Periudha e Dytë e Ndërmjetme, që zgjati nga 1640 para Krishtit deri më 1540, dhe ishte një kalim nga Mbretëria e Mesme në periudhën e Mbretërisë së Re kur faraonët egjiptianë ishin ndër figurat më të fuqishme në rajon.

“Historia politike e periudhës është fascinante dhe nuk kuptohet plotësisht, një periudhë luftërash ndërmjet shteteve që në fund të fundit solli lindjen e Mbretërisë së Re të Egjiptit”, tregoi Wegner, kustosi i seksionit egjiptian të muzeut “Penn”.

Një nga këto dinasti ishte Dinastia Abydos, një seri mbretërish që sunduan pjesë të Egjiptit të Epërm – një prej pjesëve të mbretërisë.

“Egjipti ishte i fragmentuar me katër mbretëri rivale, përfshirë Hyksosët e Deltës së Nilit”, tregoi Wegner. 

“Dinastia Abydos ishte njëra prej këtyre. Si u ndanë dhe më pas u ribashkuan përfshin pyetje të rëndësishme të ndryshimeve sociale, politike dhe teknologjike”.

Varri i mbretit të panjohur është ndërtuar brenda kompleksit të varrit të një faraoni të mëparshëm dhe të fuqishëm, Neferhotep I. Arkitektura e tij tregon lidhje me varret e mbretërve të periudhës së Mbretërisë së Mesme dhe periudhës së Dytë të Ndërmjetme, rrëfeu Wegner.

“Duket se është më i madhi dhe më i hershmi i grupit të Dinastisë Abydos. Mund të ketë të tjerë në këtë zonë, pranë varrit të Neferhotep I”, shtoi ai.

Ekipi i Wegner ka zbuluar më parë varrin e një tjetër sundimtari të Dinastisë Abydos, Seneb-Kay, në vitin 2014.

“Varri i mbretit të ri është ndoshta i paraardhësit të Seneb-Kay. Ka të tjerë në këtë zonë. Punimet në varrezat mbretërore janë të ngadalta dhe kërkojnë shumë kujdes, kështu që merr kohë për të arritur rezultate”, tregoi Wegner.

Gërmimet vazhdojnë ende. Periudha e Dytë e Ndërmjetme filloi pothuajse një mijëvjeçar pas ndërtimit të piramidave të mëdha të Gizës jashtë Kajros, që mbajtën varret e disa faraonëve të Mbretërisë së Vjetër. Më shumë faraonë të Mbretërisë së Re ishin varrosur në Luginën e Mbretërive afër Luksorit, përfshirë Tutankhamunin - i njohur si Mbreti Tut – varri i të cilit dhe përmbajtja e tij e plotë u zbuluan në vitin 1922.

Ministria e Turizmit dhe Antikiteteve të Egjiptit njoftoi më 18 shkurt se një ekip arkeologësh egjiptiano-britanikë kishte identifikuar një varr të lashtë pranë Luksorit, që daton në shekullin e 15-të para Krishtit, si varri i faraonit të Mbretërisë së Re, Thutmose II.