Një zyrtar i gjendjes civile në një nga fshatrat e komunës së Kamenicës është arrestuar të martën nga Policia e Kosovës, nën dyshimin për keqpërdorim të pozitës apo autoritetit zyrtar.
Sipas raportit policor, i dyshuari mashkull kosovar ka mundësuar regjistrimin e fëmijëve të një shtetaseje femër kosovare pa prezencën apo pajtimin e prindit tjetër – babait, duke shkelur kështu procedurat ligjore për regjistrimin civil.
Me urdhër të prokurorit, zyrtari i dyshuar është dërguar në masën e ndalimit, ndërsa nëna e fëmijëve është liruar në procedurë të rregullt.
Rasti është duke u trajtuar nga autoritetet kompetente dhe pritet që të ndërmerren veprimet e nevojshme ligjore ndaj të përfshirëve.
