Prokuroria Speciale e Kosovës njoftoi se është arrestuar një person i dyshuar për spiunazh.
Sipas njoftimit, arrestimi i të dyshuarit A.V. ka ndodhur të mërkurën mbrëma pas hetimeve disamujore nëpërmjet Agjencisë së Kosovës për Inteligjencë (AKI) dhe Policisë së Kosovës.
I dyshuari është dërguar në mbajtje për 48 orë dhe aktualisht Policia e Kosovoës po kryen bastisje në banesën e të dyshuarit.
“Prokuroria Speciale e Republikës së Kosovës, pas zhvillimit të hetimeve disa mujore në bashkëpunim me Agjencinë e Kosovës për Inteligjencë dhe Policinë e Kosovës - Drejtorinë Kundër Terrorizmit sot në mbrëmje, në regjionin e Mitrovicës ka arrestuar një person. I arrestuari A.V. dyshohet për kryerjen e veprës penale ‘Spiunazhi’, nga neni 124 të KPRK-së. I njëjti me aktvendim të Prokurorit të Shtetit nga Prokuroria Speciale është ndaluar prej 48 orësh dhe për momentin nga Policia e Kosovës janë duke u kryer bastisje në banesën e të dyshuarit”, thuhet në njoftimin e Prokurorisë.
Burimet e KOHËS brenda Prokurorisë Speciale bëjnë të ditur se i dyshuari është i nacionalitetit serb.
Javë më parë janë arrestuar dy persona në Ferizaj për veprën e njëjtë.
Atyre u është caktuar një muaj paraburgim.
