(E përditësuar) - Policia ka konfirmuar arrestimin e të dyshuarit për veprën penale "dhunë në familje". Ai është dërguar në mbajtje për 48 orë.
Kryetari i Gjilanit, Alban Hyseni, ka njoftuar se Policia ka arrestuar një person që dyshohet se e ka keqtrajtuar një grua me probleme mendore me inicialet A.S.
Në një njoftim në Facebook, Hyseni ka thënë se i dyshuari është arrestuar dje.
“Policia e Kosovës ka identifikuar dhe arrestuar të dyshuarin gjatë mbrëmjes së djeshme. Organet e rendit po vijojnë hetimet për të zbardhur plotësisht rastin”, thuhet në njoftim.
Hyseni ka njoftuar se ka qenë në komunikim të vazhdueshëm me institucionet e rendit dhe ato shëndetësore, duke siguruar se janë ndërmarrë të gjitha masat e nevojshme për trajtimin e rastit.
Ai konfirmoi se viktima është tashmë e sigurt dhe ndodhet në rehabilitim shëndetësor.
Viktimës iu publikuan disa foto në rrjetet sociale gjatë ditës së djeshme ku shihet e mavijosur në fytyrë. Ajo përveç keqtrajtimit, dyshohet se edhe është trafikuar.
