Një 33-vjeçar nga Tropoja, i shpallur në kërkim ndërkombëtar, i akuzuar si pjesëtar i një organizatë kriminale për trafikim të armëve, është arrestuar nga policia kolumbiane në qytetin e Kartagjenës.
Në bashkëpunim me homologët, për lokalizimin dhe kapjen e shtetasve të shpallur në kërkim ndërkombëtar, bazuar dhe në informacionet e shkëmbyera mes strukturave të Policisë së Shtetit në Shqipëri dhe atyre të Kolumbisë, nëpërmjet Interpol Tiranës, në kuadër të operacionit policor “Kartagjena”, është lokalizuar, kapur dhe ndaluar i dyshuari A.Gj.
Ai ishte shpallur në kërkim ndërkombëtar, pasi Gjykata e Posaçme Kundër Korrupsionit dhe Krimit të Organizuar në Shqipëri, e akuzon si pjesëtar të një organizate kriminale për trafikimin e armëve, raportoi “TCH”.
Roli i tij kryesor ishte të drejtonte logjistikën dhe transportin për shitjen e armëve të zjarrit me rreze të mesme dhe të gjatë në tregun e zi.
Interpol Tirana, në bashkëpunim me autoritetet kolumbiane, do të kryejë procedurat për ekstradimin e tij në Shqipëri.
