Vetëm barazim për Zvicrën
Zvicra mori vetëm një pikë në ndeshjen ndaj Serbisë.
Të premten mbrëma në Zurich ndeshja mes Zvicrës dhe Serbisë përfundoi 1:1. Zeki Amdouni kaloi në epërsi Zvicrën në minutën e 78-të me supergol. Ndërkohë për Serbinë shënoi Aleksa Terziq në minutën e 88-të, pas një kundërsulmi.
Granit Xhaka e udhëhoqi si kapiten Zvicrën. U ndëshkua me karton të verdhë, ndërsa kishte një moment tensioni me lojtarët e Serbisë. Andi Zeqiri u aktivizua në pjesën e dytë.
Serbia humbi penallti po ashtu.
Një xhiro para fundit, Zvicra i ka vetëm dy pikë dhe është e fundit në grupin 4 të Ligës A të Ligës së Kombeve.
Ka pasur thirrje anti-Kosovë nga huliganët serbë në ndeshjen në Zuerich. Po ashtu është shfaqur flamuri i Serbisë mbi hartën e Kosovës.
Të hënën, Zvicra luan ndaj Spanjës në Tenerife, ndërsa Serbia e pret Danimarkën.
Zvicra në epërsi ndaj Serbisë
Zvicra po udhëheq 1:0 ndaj Serbisë në ndeshjen në Zurich.
Golin e shënoi Zeki Amdouni në minutën e 79-të. Ai shënoi supergol.
Penallti për Serbinë, pret Kobel
Serbia ka humbur penallti në ndeshjen ndaj Zvicrës.
Gregor Kobel priti gjuajtjen e Mitroviqit nga pika e bardhë në minutën e 55-të.
Rezultati mbetet 0:0.
Tensione në ndeshjen Zvicër – Serbi, i përfshirë edhe Xhaka
Ka tensione në fillim të pjesës së dytë të ndeshjes Zvicër – Serbi.
Pasi Embolo goditi me top një lojtar të Serbisë u krijua një tollovi, ku i përfshirë ishte edhe Xhaka.
Zvicra e Serbia po barazojnë pa gola pas pjesës së parë
Zvicra e ka goditur traversën, por nuk ka shënuar gol në pjesën e parë të ndeshjes ndaj Serbisë.
Huliganët serbë kanë bërë thirrje kundër Kosovës, ndërsa është paraqitur edhe flamuri i Serbisë mbi hartën e Kosovës.
Vazhdojnë provokimet e huliganëve serbë në Zurich
Thirrje “Kosova është Serbi” janë dëgjuar edhe në stadiumin në Zurich ku po përballen Zvicra e Serbia.
Këtë e bën të ditur mediumi “20min.ch”.
Rezultati mbetet 0:0.
Huliganët serbë fishkëllejnë kur thirret emri i Xhakës
Derisa emrat e lojtarëve të Zvicrës janë thirrur para ndeshjes me Serbinë, ka pasur fishkëllima të tifozëve serbë në tribunat e stadiumit në Zurich.
Më së shumti fishkëllima kishte kur u thirr emri i Granit Xhakës, shkruan 20min.ch.
Xhaka udhëheq Zvicrën ndaj Serbisë
Granit Xhaka e udhëheq si kapiten Zvicrën në ndeshjen ndaj Serbisë. Ndeshja zhvillohet prej orës 20:45 dhe është vendimtare për Zvicrën.
Zvicra përballet me mungesa të shumta. Në stol te helvetikët janë Albian Hajdari, Ardon Jashari e Andi Zeqiri.
