Drita e Prishtina përballen të mërkurën në gjysmëfinalen e parë të Kupës së Kosovës në futboll.
Ndeshja zhvillohet në fushën me bari artificial në Gjilan nga ora 15:00.
Drita është lidere e Superligës dhe vlerësohet favorite në ndeshjen e parë. Por Prishtina udhëton për rezultat sa më të favorshëm, që në ndeshjen e kthimit, pas dy javësh, të jetë në pozitë sa më të mirë për ta siguruar finalen.
Te Prishtina debuton Arsim Thaqi, që të dielën u zyrtarizua në postin e trajnerit. Në fakt për Thaqin është vetëm kthim te Prishtina.
Gjysmëfinalja tjetër është mes Llapit dhe Drenicës. Zhvillohet të enjten nga ora 15:00 në Podujevë.
Llapi po garon për mbetje në Superligë, ndërsa aktualisht është në zonën që dërgon në kategorinë e dytë. Ndërkohë Drenica është lidere në Grupin A të Ligës së Parë.
Fituesja e Kupës së Kosovës kualifikohet për raundin e parë kualifikues të Ligës së Evropës.
