Superylli i futbollit, Lionel Messi thotë se Inter Miami do të jetë klubi ku ai do të mbyllë karrierën e tij legjendare.
Messi me Inter Miamin ka kontratë deri në fund të sezonit 2025.
“Po, që nga sot, mendoj se do të jetë klubi im i fundit”, ka thënë Messi të mërkurën në intervistë për “ESPN”.
Messi, i cili mbush 37 vjet më 24 qershor, shtoi se nuk e di se kur do të jetë fundi i karrierës.
“As unë nuk jam gati të largohem nga futbolli”, ka shtuar Messi.
Tetë herë fituesi rekord i “Topit të Artë” u bë i famshëm gjatë kohës sa ishte te Barcelona, duke ndihmuar ekipin spanjoll të fitoj katër Liga të Kampionëve dhe dhjetë tituj në La Liga.
Ai ka folur edhe për kalimin në Inter Miami.
Pasi luajti për Barçën nga viti 2004 deri në vitin 2021, Messi iu bashkua Paris Saint-Germainit, skuadër për të cilën luajti nga viti 2021 deri në vitin 2023.
Vitin e kaluar kaloi te Inter Miamni.
“Ishte një hap i vështirë për të lënë Evropën. Fakti i të qenit kampion bote më ndihmoi shumë për t’i parë gjërat gjithashtu ndryshe”, është shprehur Messi.
Ai me Argjentinën fitoi Kupën e Botës “Katari 2022”, ndërsa synon të paraqitet me Argjentinën edhe në Kupën e Botës 2026.
Botërori në vitin 2026 mbahet në SHBA, Meksikë dhe Kanada.
