Malisheva e ka shokuar kampionin e tri edicioneve të fundit në Kosovë, Ballkanin.
Të dielën në stadiumin “Liman Gegaj”, Malisheva fitoi 3:2 ndaj suharekasve, ndonëse tërë pjesën e dytë e zhvilloi me një futbollist më pak në fushë.
Ky ballafaqim i takoi xhiros së katërt të Superligës së Kosovës në futboll.
Arbër Prekazi e hapi serinë e golave në Malishevë në minutën e 16-të.
Shifrat për Ballkanin i barazoi sulmuesi Sunday Adetunji në minutën e 28-të.
Por në minutën e parë të shtesës në pjesën e parë, Malisheva mbeti me një futbollist më pak në fushë.
Mesfushori Etnik Brruti u përjashtua nga loja pasi mori kartonin e dytë të verdhë.
Por skuadra e udhëhequr nga trajneri Bekim Isufi, befasoi në pjesën e dytë.
Kaloi në epërsi 2:1, me golin e Drilon Hazrollajt në minutën e 61-të.
Fatjon Bunjaku më pas në minutën e 73-të shënoi për 3:1.
Queven Inacios që asistoi në golin e parë, shënoi vetë për 3:2 për suharekasit në minutën e parë të kohës shtesë.
Por, Ballkani i trajnerit Ilir Daja nuk e pati forcën që të kthehej më në lojë, dhe pësoi disfatë për herën e parë në edicionin aktual.
Ballkani i ka edhe dy fitore, ndaj Dukagjinit dhe Feronikelit 74, kurse barazoi me Gjilanin.
Me shtatë pikë, bashkë me Prishtinën, Suharekën dhe Malishevën, janë në krye të tabelës.
Suharekasit e kanë një ndeshje më shumë të luajtur.
Në xhiron e pestë, Malisheva luan në udhëtim te Dukagjini, ndërsa Ballkani e pret Prishtinën.
Ballkani ngushton rezultatin
Ballkani ka shënuar golin e dytë në ndeshjen ndaj Malishevës.
Queven shënoi për 3:2 në minutën e 91-të.
Malisheva shënon edhe golin e tretë ndaj Ballkanit
Malisheva e ka shënuar edhe golin e tretë në ndeshjen ndaj kampionit të Kosovës, Ballkanit.
Fatjon Bunjaku shënoi gol nga afërsia në minutën e 73-të.
Malisheva po fiton 3:1 në stadiumin “Liman Gegaj”.
Malisheva shokon Ballkanin
Malisheva ka kaluar në epërsi 2:1 ndaj Ballkanit, ndonëse ka një lojtar më pak në fushë. Drilon Hazrollaj shënoi golin në minutën e 61-të.
Karton i kuq edhe në Malishevë
Skuadra e Malishevës ka mbetur pa mesfushorin Etnik Brruti, i cili brenda pak minutash mori dy kartonë të verdhë.
Brruti u përjashtua nga loja në minutën e parë shtesë të pjesës së parë.
Malisheva gjithë pjesën e dytë ndaj Ballkanit duhet ta zhvillojë me 10 lojtarë.
Me rezultatin 1:1 skuadrat kanë shkuar në pushim.
Ballkani kthehet në lojë
Adetunji në minutën e 28-të shënoi me kokë nga afërsia, pas asistimit të Queven Inacios.
Prekazi kalon Malishevën në epërsi
Arbër Prekazi ka shënuar gol për Malishevën që po avancon ndaj Ballkanit me rezultatin 1:0.
Prekazi shënoi me kokë nga afërsia, në ndeshjen e xhiros së katërt të elitës së futbollit të Kosovës.
Ndeshja po luhet në stadiumin “Liman Gegaj” në Malishevë.
