Selektori i Holandës, Ronald Koeman, e ka publikuar listën përfundimtare prej 23 futbollistëve për ndeshjet e muajit shtator në Ligën e Kombeve.
Javë më parë Koeman e publikoi listën preliminare me 35 futbollistë. Koeman ka vendosur që t’i ftojë vëllezërit Jurrien Timber dhe Quinten Timber.
Mbrojtësi i Arsenalit, Jurrien Timber është kthyer në përfaqësuesen e Holandës pas një kohe të gjatë. Ai i mungoi Holandës dhe Arsenalit për një vit pasi u përball me një lëndim të rëndë. Quinten është ftuar për herë të dytë te Holanda. Ai debutoi në ndeshjen miqësore ndaj Gjermanisë të zhvilluar në muajin mars. Jashtë listës kanë mbetur futbollistë të njohur si Memphis Depay, Georginio Wijnaldum dhe Frenkie de Jong.
Holanda ndeshjen e parë në edicionin e ri të Ligës së Kombeve do ta ketë ndaj Bosnjë-Hercegovinës më 7 shtator. Holanda është në Grupin 3 të Ligës A të Ligës së Kombeve. Në grup me Holandën janë edhe Gjermania dhe Hungaria.
