Përfaqësuesja e Kosovës në futbollin e sallës, të premten i nis kualifikimet për Evropianin e vitit 2026, që do të organizohet në Letoni e Lituani. Kosova ndeshjen e parë e luan në Tbilisi ndaj Gjeorgjisë, çerekfinalistes së Evropianit 2022.
Ky ballafaqim nis në orën 15:00. Në ndeshjen tjetër të Grupit 10 takohen Bullgaria e Franca.
Më 17 dhjetor, Kosova luan ndaj Bullgarisë prej orës 20:00.
Ndeshjet tjera, Kosova e udhëhequr nga përzgjedhësi Agon Ramadani, i luan në janar, shkurt e prill të vitit të ardhshëm.
Fituesit e dhjetë grupeve të fazës kualifikuese “Main Round”, kualifikohen në Evropian, ndërsa tetë skuadrat më të mira të vendit të dytë luajnë në plejof.
Përzgjedhësi Ramadani e mori drejtimin e Kosovës në futsall më 3 shkurt të vitit të kaluar.
Debutoi me barazimin 3:3 ndaj Holandës në kualifikimet për Botërorin 2024.
Në një turne në Poreç të Kroacisë pati një humbje nga Sllovenia e një barazim me Malin e Zi, ndërsa nga një fitore në miqësore arriti ndaj Arabisë Saudite, Hungarisë e Letonisë.
Me Hungarinë e Letoninë e ka edhe nga një barazim në miqësore, ndërsa është mposhtur nga Kroacia.
