Ndonëse ishte duke humbur në pjesën e parë nga West Hami, Chelsea në fund fitoi ndeshjen me rezultatin 2:1. Ndeshja Chelsea – West Ham u zhvillua të hënën mbrëma dhe i takoi javës së 24-t të Premier Leagues së Anglisë.
Golin e epërsisë për mysafirët e shënoi Jarrod Bowen në minutën e 42-të. Chelsea në pjesën e dytë u kthye dhe shënoi dy golat e fitores.
Fillimisht në minutën e 64-t barazoi rezultatin në përmjet Pedro Netos, kurse në minutën e 74-t, fitoren Chelseat ia siguroi autogoli i shënuar nga Aaron Wan-Bissaka.
Me fitoren e arritur të hënën, Chelsea është ngritur në vendin e katërt me 43 pikë, ndërsa West Hami zë pozitën e 15-të me 27 pikë.
