Përzgjedhësi i Zvicrës në futboll, Murat Yakin, ka thënë se skuadra e tij ka shumë vetëbesim para ndeshjes ndaj Italisë, në fazën e 1/8 së finales së Kampionatit Evropian 2024.
Ky ballafaqim luhet të shtunën nga ora 18:00 në Berlin.
“Do të luajmë për të avancuar. Nuk mund të themi se jemi favoritë, sepse luajmë kundër Italisë, por barazimi ndaj Gjermanisë na ka dhënë shumë vetëbesim dhe këtë nuk mund ta fshehim. I kemi ndjekur ndeshjet e Italisë me kujdes, kemi analizuar taktikat dhe strategjinë. Mezi presim të luajmë. Italianët janë të paparashikueshëm, por jemi të përgatitur. Edhe nga aspekti mental mund t’i mbijetojmë një ndeshjeje të tillë”, ka deklaruar ndër të tjera selektori i helvetikëve për mediumin “SRF” të Zvicrës.
