Selektori Sylvinho ka arsyetuar vendimin për të kthyer Amir Abrashin në Kombëtare për Euro 2024.
Abrashi nuk ka luajtur për Shqipërinë për një periudhë por është në listën e 27 lojtarëve. Lista finale prej 26 futbollistëve do të publikohet më 7 qershor.
“Abrashi është lojtar me shumë përvojë. Është i vetmi mesfushor në këtë listë që ka luajtur në Euro 2016. Me karakteristikat që ka përfaqëson më së miri shpirtin e kësaj skuadre kombëtare. Ka edhe përvojë shumë të madhe”, ka thënë Sylvinho në konferencë për shtyp.
Ai ka folur për lojtarët e ftuar e jo për ata që kanë mbetur jashtë si Sokol Cikalleshi, Myrto Uzuni, Keidi Bare, Arbnor Muja e shumë të tjerë. Medon Berisha është emër i ri në listë. Sylvinho ka thënë se atë e ka përcjellë gjatë.
“Lojtar shumë i talentuar dhe e vlerësojmë punën e bërë në grupmoshën U21. Berisha duhet të jap përgjigjet e tij në fushën e lojës. Berisha është lojtar që mund të jetë gati për Kombëtaren A”, ka theksuar Sylvinho.
