Përfaqësuesja e Zvicrës është duke u përgatitur për ndeshjen ndaj Anglisë. Zvicra dhe Anglia do të takohen të shtunën në çerekfinale të “Euro 2024”.
Në stërvitjen e mbajtur të premten, portierët Yann Sommer dhe Gregor Kobel janë parë duke ushtruar me syze të diellit të vëna.
“The Sun” ka raportuar se dy portierët e Zvicrës kanë stërvitur me syze japoneze që janë me bateri dhe që krijojnë një efekt të ngadaltë kur një top goditet. Raportohet se syzet japoneze i ndihmojnë portierët të përmirësojnë pritjet e tyre në ndeshje.
Sommer është portieri i parë te Zvicra në Kampionatin Evropian. Ndërsa Kobel është alternativa e dytë në portë te Zvicra për selektorin Murat Yakin.
Zvicra në një të tetën e finales e ka mposhtur kampionen në fuqi të Evropës, Italinë me rezultatin 2:0.
Anglia është kualifikuar në çerekfinale pasi e ka eliminuar Sllovakinë me rezultat 2:1.
