-
Nga:
Ardit Kika
- 22 dhjetor 2024 11:23
- Shpërndaje në:
Qeveria e Kosovës ka vendosur të ndajë nga 100 euro shtesë të njëhershme për pensionistët dhe po ashtu për gjithë fëmijët të moshave deri 16 vjeç.
Kryeministri i Kosovës, Albin Kurti, në një konferencë për media së bashku me ministrin e Financave, Hekuran Murati, ka thënë se po ndahen këto shtesa pas performancës së mirë ekonomike.
"Të dashur fëmijë, të gjithë ju që jeni të moshës nga 0 deri në 16 vjeç, dhe që jeni pranues të shtesave mujore për fëmijë, do t’i përfitoni edhe sivjet nga 100 euro secili. Kjo nuk është vetëm një dhuratë e fundvitit nga shteti juaj, por është investim në mirëqenien e të gjithë fëmijëve pa dallim. Andaj, edhe ju të dashur prindër, t’i rrisni fëmijët me shëndet por edhe me dashurinë për shtetin e tyre, kur vlerat dhe dashuria për vendin brumosen që në fëmijëri, e ardhmja e Republikës sonë pa dyshim që do të jetë në duar të sigurta. Por, përveç investimit në fëmijët që janë edhe e tashmja e sidomos e ardhmja jonë, duhet të kujdesemi që t’i mbështesim edhe ata që kontribuan dhe ndërtuan shtetin e na sollën deri këtu. Prandaj, sikurse tashmë e kemi bërë traditë që sa herë që ka buxhet të mjaftueshëm dhe ekonomia rritet përtej projeksioneve, në fund të vitit po ndajmë mbështetje shtesë të njëhershme nga 100 euro, apo siç disa edhe kanë filluar ta quajnë pensionin e 13-të për të gjithë pensionmarrësit të cilët kualifikohen. Kjo shënon mbështetjen e 5-të brenda mandatit tonë që një mbështetje e tillë shpërndahet te pensionistët tanë", tha Kurti.
E ministri Murati tha do të mundohen t'i ekzekutojnë javën e ardhshme mjetet.
“Sikurse vitin e kaluar s’ka nevojë për ndonjë aplikim. I kemi listat e përfituesve në data bazat tona, si për pensionistë ashtu edhe për marrësit e shtesave për fëmijë. Do të mundohemi gjatë kësaj jave që të bëjmë përgatitjet teknike që të ekzekutohen pagesat për këtë javë", tha Murati.
Ndarja e 100 eurove për fëmijë e pensionistë, Bajrami e quan vendimin “skemë të korrupsionit publik”
Foto: KP
Ndaj vendimit për ndarjen e shtesave ka reaguar ish-ministrja e Financave, deputetja nga radhët e LDK-së, Hykmete Bajrami.
Ajo e ka quajtur “skemë e korrupsionit publik”.
“Shpërndarja e buxhetit të shtetit në kohë fushate është skemë e korrupsionit publik. Qeveria e cila investimet kapitale në vitin 2024 i ka më të ulëta se në vitin 2017 e 2018, e kanë shti buxhetin në thes të babadimrit dhe kanë dalë me ble vota. Qeveria e cila gjatë mandatit i ka dyfishuar faturat e energjisë elektrike, e ka dyfishuar tatimin në pronë, i ka poshtëruar shërbyesit civilë, i ka fyer sindikatat, e ka detyru njësinë elitare të Policisë me dalë në protestë, i ka mbetur ushtria pa bukë e policët pa këpuca, i ka maltretuar prindërit dy vjet radhazi me blerjen e librave, qeveria në mandatin e së cilës janë rritë çmimet si kurrë më parë, sot me para të taksapagusëve po tenton me ble vota. Janë 4 vjet të humbura Jeni në panik, por as kjo skemë nuk ju shpëton dot. Më 9 shkurt votohet për ndryshim jo për lëmoshë!” – ka shkruar Bajrami në Facebook.
Po ashtu ka reaguar edhe Berat Rukiqi i LDK-së.
“Asgjë e re. Qeveria në panik, vazhdon përdorimin e parasë publike, për blerje të votave. Ky është keqpërdorim eklatant i parasë publike, që as nuk ndihmon, e as nuk zhvillon. Të njëjtat para, me automatizëm, do të shkojnë në faturat e shtrenjta të energjisë elektrike”, ka shkruar Rukiqi në Facebook.
