Vriten dy ushtarë izraelitë në Bregun Perëndimor të pushtuar

Ushtria izraelite ka bërë të ditur se dy ushtarë janë vrarë në një sulm me armë zjarri në Bregun Perëndimor të pushtuar, teksa siç ka thënë, forcat e saj vazhdojnë një operacion të madh kundër grupeve të armatosura palestineze në veri të territorit.

Tetë ushtarë të tjerë janë plagosur kur një person i armatosur palestinez ka gjuajtur me armë zjarri në një pikë kontrolli në fshatin Tayasir, 2 km në veri të Tubas, thuhej në një deklaratë ushtarake. Sulmuesi është qëlluar për vdekje, sipas ushtrisë, raporton BBC.

Hamasi dhe Xhihadi Islamik Palestinez e kanë vlerësuar sulmin si një përgjigje ndaj operacionit izraelit në Tubas, Jenin dhe Tulkarm, por asnjëra nuk kanë thënë se qëndrojnë pas tij.

Ndërkohë, një zyrtar i OKB-së ka paralajmëruar se situata në kampin e refugjatëve në Jenin po shkon në një "drejtim katastrofik".

Kryeministri izraelit, Benjamin Netanyahu, ka njoftuar më 21 janar fillimin e një operacioni në shkallë të gjerë për të "mposhtur terrorizmin" në Jenin, tre ditë pas hyrjes në fuqi të armëpushimit në Rripin e Gazës. Operacioni është zgjeruar në Tulkarm dhe Tubas javën e kaluar.

Ministria palestineze e Shëndetësisë thotë se forcat izraelite kanë vrarë 70 palestinezë në të gjithë Bregun Perëndimor, duke përfshirë Jerusalemin Lindor të pushtuar, që nga fillimi i vitit.

Shifra përfshin 25 të vrarët e raportuar në zonën e Jeninit dhe 13 në zonat Tubas dhe Tulkarm gjatë dy javëve të fundit.