Ushtria ukrainase pretendon se ka fundosur një anije ruse

Ushtria e Ukrainës ka thënë të mërkurën se ka fundosur një anije zbarkuese ruse në Detin e Zi duke përdorur dronë detarë, raportim që nuk është konfirmuar nga forcat ruse.

Anija “Caesar Kunikov” u fundos afër Alpukas, qytet në cepin jugor të Gadishullit të Krimesë, të cilin Moska e aneksoi në vitin 2014, ka thënë Shtabi i Përgjithshëm i Ukrainës. Sipas tyre në anije kishte 87 anëtarë të ekuipazhit.

Përmbytja e anijes do ishte goditje e turpshme për flotën detare ruse dhe sukses i rëndësishëm për Ukrainën, 10 ditë para përvjetorit të dytë të fillimit të pushtimit të plotë nga Rusia.

Ukraina është kthyer në defensivë, e shtyrë kjo nga municionet e pakta dhe mungesa e personelit, por ka vazhduar sulmet prapa vijës së frontit 1,500-kilometërshe.

Është hera e dytë brenda dy javëve që Ukraina ka thënë se ka fundosur anije ruse në Detin e Zi.

Inteligjenca Ushtarake e Ukrainës, e njohur si GUR, ka thënë se njësia e operacioneve speciale të “Grupit 13” ka fundosur “Caesar Kunikov” të mërkurën, duke përdorur dronët detarë Magura V5 me të cilat ka dëmtuar pjesën e majtë të anijes. Njësia e njëjtë ka goditur gjithashtu një anije ruse më 1 shkurt, sipas zyrtarëve.

Sulmet ukrainase mbi avionët dhe anijet ruse në Detin e Zi kanë ndihmuar shtyrjen prapa të flotës detare të Moskës nga bregdeti, duke i lejuar kështu Kievit të rrisë eksportet e drithërave dhe të të mallrave tjera në portet e saja jugore.

Gjenerata e re e sistemeve të armëve është bërë pikë kryesore e luftës, si në det ashtu edhe në tokë.

Droni Magura V5, i cili duket si një skaf i zi, u zbulua vitin e kaluar. Është raportuar se ka shpejtësi prej 30 kilometra në orë dhe mund të mbajë ngarkesë prej 320 kilogramëve.

Ushtria ruse nuk ka komentuar për fundosjen e pretenduar, duke thënë vetëm se ka rrëzuar gjashtë dronë ukrainas mbi Detin e Zi brenda natës.

Caesar Kunikov, sipas të cilit është emërtuar anija, ka qenë hero i Bashkimit Sovjetik gjatë Luftës së Dytë Botërore dhe ka vdekur më 14 shkurt 1943.

??military intelligence agency (HUR) showed the overnight attack by Magura naval drones on the??large landing ship Caesar Kunikov, reportedly the newest vessel of Russia's Black Sea Fleet.

?HUR pic.twitter.com/oC1rFYuQaa

— Euromaidan Press (@EuromaidanPress) February 14, 2024