Ukraina ka fundosur ose ka çaktivizuar një të tretën e të gjitha anijeve luftarake ruse në Detin e Zi, në pak më shumë se dy vjet luftë, ka theksuar të martën zëdhënësi i marinës ukrainase, Dmytro Pletenchuk.
Pletenchuk tha për Associated Press se sulmi i fundit të shtunën goditi anijen zbarkuese ruse “Kostiantyn Olshansky”, e cila kishte ndaluar në port të Sevastopolit në Krimenë e pushtuar nga Rusia. Anija ishte pjesë e marinës ukrainase përpara se Rusia ta kapte atë ndërsa aneksonte gadishullin e Detit të Zi në vitin 2014.
Pletenchuk ka njoftuar më parë se dy anije të tjera zbarkuese të të njëjtit lloj, Azov dhe Yamal, gjithashtu u dëmtuan në sulmin e së shtunës së bashku me anijen e inteligjencës Ivan Khurs.
Ai i tha AP-së se sulmi i fundjavës, i cili u bë me raketat “Neptune” të ndërtuara në Ukrainë, goditi gjithashtu objektet portuale të Sevastopolit dhe një depo nafte.
Autoritetet ruse raportuan një sulm masiv ukrainas në Sevastopol gjatë fundjavës, por nuk pranuan ndonjë dëmtim të flotës.
Pletenchuk ka treguar se me sulmin e fundit, një e treta e të gjitha anijeve luftarake që Rusia kishte në Detin e Zi para luftës janë shkatërruar ose çaktivizuar. Në të njëjtën kohë, ai pranoi se vetëm dy nga rreth dhjetëra anije luftarake ruse me raketa janë fundosur dhe u zotua se Ukraina do të vazhdojë sulmet.
Sulmet e suksesshme me dronë dhe raketa ukrainase kanë rritur moralin në Kiev.
Sfidimi i epërsisë detare të Rusisë ka ndihmuar gjithashtu në krijimin e kushteve më të favorshme për eksportet e grurit të Ukrainës dhe dërgesat e tjera nga portet e vendit të Detit të Zi.
Zyrtarët e Moskës kanë kritikuar ashpër ushtrinë për reagimin e saj të ngadaltë ndaj kërcënimit.
Në fillim të këtij muaji, media ruse raportoi se shefi i marinës ruse, admirali Nikolai Yevmenov, ishte shkarkuar dhe zëvendësuar me admiralin Alexander Moiseyev, komandantin e Flotës Veriore të Rusisë. Kremlini nuk e ka njoftuar ende riorganizimin, por javën e kaluar Moiseyev u prezantua si shefi i ri në detyrë i marinës gjatë një ceremonie në një bazë detare ruse.
