Autoritetet elektorale të Turqisë kanë anuluar vendimin që ia mohonte një kandidati prokurd të sapozgjedhur të drejtën për ta mbajtur postin e kryetarit në qytetin lindor turk të Vanit, raporton BBC.
Abdullah Zeydan fitoi zgjedhjet për kryetar në provincën lindore Van me më shumë se 55% të votave.
Por autoritetet elektorale ia mohuan atij fitoren dhe e zëvendësuan atë me kandidatin që doli i dyti në zgjedhjet lokale - kandidatin nga partia e presidentit turk Recep Tayyip Erdogan.
Vendimi për mohimin e mandatit të Zeydanit, i cili vjen nga radhët e partisë prokurde DEM, nxiti reagime dhe protesta në të gjithë Turqinë juglindore.
Partia DEM e cilësoi vendimin si “puç politik” dhe i kërkoi qeverisë të respektojë vullnetin e votuesve të Vanit.
Protestat shpërthyen në Van, në qytetin me shumicë kurde, duke bërë që policia të përdorte gaz lotsjellës për t’i shpërndarë protestuesit.
Qyteti i Vanit është një nga 10 zonat e fituara nga partia prokurde DEM në jug dhe juglindje të Turqisë në zgjedhjet lokale të së dielës së kaluar.
