-
Nga:
Flutura Gashi-Mehmeti
- 20 qershor 2024 14:54
- Shpërndaje në:
Të paktën 530 egjiptianë kanë vdekur duke marrë pjesë në haxh dhe 31 të tjerë janë zhdukur pasi vapa ekstreme goditi pelegrinazhin vjetor mysliman në Mekë, kanë thënë burimet mjekësore dhe të sigurisë për Reuters të enjten.
Qindra njerëz nga vende të ndryshme kanë vdekur ditët e fundit në qytetin e Arabisë Saudite, ku temperaturat ndonjëherë kanë shkuar deri në 51 gradë celsius.
Burimi mjekësor, i cili ishte me delegacionin zyrtar egjiptian të haxhit, tha se shumica e atyre që vdiqën nuk ishin të regjistruar zyrtarisht për ngjarjen, që do të thoshte se ata nuk mund të hynin në tenda.
Një dëshmitar i Reutersit ka thënë se mijëra pelegrinë shtriheshin në rrugë, të ekspozuar ndaj diellit, në ngjitjen në malin Arafat, që është një nga ritualet e udhëtimit.
Shtylla e pestë e Islamit, haxhi është i detyrueshëm një herë në jetë për çdo mysliman të aftë që mund ta përballojë atë dhe është manifestimi më domethënës i besimit dhe unitetit islam. Veprimtaria e këtij viti, e cila filloi të premten e kaluar, pritet të tërheqë afro 2 milionë pelegrinë.
Shkencëtarët e klimës kanë thënë se temperaturat në rritje përbëjnë një kërcënim në rritje për ngjarjen, megjithëse vdekjet e lidhura me nxehtësinë përgjatë haxhit nuk janë të reja dhe janë regjistruar që në vitet 1400.
Autoritetet egjiptiane nuk e kanë konfirmuar numrin e të vdekurve.
Ministria e Jashtme dhe ministria e Emigracionit kanë thënë se po bashkëpunojnë me zyrtarët sauditë në ndjekjen e kërkimit të egjiptianëve të zhdukur dhe raporteve në lidhje me viktimat.
LEXO EDHE:
