Të paktën 13 të vdekur nga një sulm rus në Zaporizhzhia

Të paktën 13 persona janë vrarë dhe dhjetëra janë plagosur në një sulm ajror rus në Zaporizhzhia të mërkurën, sipas presidentit të Ukrainës.

Volodymyr Zelensky ka paralajmëruar se numri i viktimave mund të rritet, raporton AP.

Kreu i rajonit raportoi sulmin në faqen e tij në Telegram, duke shtuar se operacionet e shpëtimit po vazhdojnë.

Pak minuta para sulmit, ai ka paralajmëruar për kërcënimin e "raketave me shpejtësi të lartë" dhe "bombave rrëshqitëse" që do të hidheshin në rajonin e Zaporizhzhias.

Ai ka thënë pasditen e së mërkurës se Rusia kishte në shënjestër Zaporizhzhian me bomba rrëshqitëse, teksa më pas, të paktën dy bomba goditën ndërtesat e banimit.