Tanket izraelite shumë pranë zonës së strehimit Mawasi në Rafah

Tanket izraelite kanë përparuar të dielën duke u vendosur shumë pranë kampit të personave të zhvendosur Mawasi në veriperëndim të qytetit jugor të Gazës, Rafah, dhe duke kryer luftime të ashpra me luftëtarët e udhëhequr nga Hamasi, kanë thënë banorët.

Imazhet e dy tankeve izraelite të vendosura në majë të një kodre me pamje nga zona bregdetare u bënë virale në mediat sociale, raporton Reuters.

Më shumë se tetë muaj pas luftës së Izraelit në enklavën palestineze të administruar nga Hamasi, avancimi i tij është i përqendruar në dy zonat që forcat e tij ende nuk kanë kapur: Rafah në skajin jugor të Gazës dhe zonën përreth Deir al-Balah në qendër.

Banorët kanë thënë se tanket izraelite janë futur më thellë në Rafahun perëndimor dhe verior në ditët e fundit, duke hedhur në erë dhjetëra shtëpi.

Ushtria izraelite ka thënë se po vazhdonte "operacionet e bazuara në inteligjencë dhe në shënjestër" në zonën e Rafahut dhe se kishte gjetur depo armësh dhe boshte tunelesh dhe kishte vrarë persona të armatosur palestinezë.

Krahët e armatosur të Hamasit dhe lëvizjes së Xhihadit Islamik kanë deklaruar se luftëtarët e tyre kishin sulmuar forcat izraelite në Rafah me raketa antitank dhe bomba mortajash dhe pajisje shpërthyese të paravendosura.

Diku tjetër, një sulm ajror izraelit ka vrarë tetë palestinezë në Sabra, një periferi e qytetit të Gazës në veri, dhe një sulm tjetër vrau dy njerëz në Nuseirat në Gazën qendrore.

Ushtria ka thënë se kishte goditur dhjetëra objektiva në të gjithë Rripin.

Të shtunën, zyrtarët palestinezë shëndetësorë kanë thënë se të paktën 40 palestinezë ishin vrarë në sulme të veçanta izraelite në disa rrethe veriore të Gazës, ku ushtria izraelite tha se kishte sulmuar infrastrukturën ushtarake të Hamasit. Mirëpo Hamasi tha se objektivat ishin popullsia civile.

Në Beit Lahiya në Rripin verior të Gazës, zyrtarët shëndetësorë në Spitalin “Kamal Adëan” kanë thënë se një foshnjë kishte vdekur nga kequshqyerja, duke e çuar numrin e fëmijëve të vdekur nga kequshqyerja ose dehidratimi që nga 7 tetori në të paktën 30.

Fushata tokësore dhe ajrore e Izraelit në Gaza u shkaktua kur militantët e udhëhequr nga Hamasi hynë në jug të Izraelit më 7 tetor, duke vrarë rreth 1,200 njerëz dhe duke kapur më shumë se 250 pengje, sipas të dhënave izraelite.

Ofensiva e ka lënë Gazën në gërmadha, duke vrarë më shumë se 37,400 njerëz, sipas autoriteteve shëndetësore palestineze, dhe ka lënë pothuajse të gjithë popullsinë të pastrehë dhe të varfër.