Një shkëmbim i të burgosurve është organizuar në mes Shteteve të Bashkuara të Amerikës dhe regjimit taliban në Afganistan. Dy amerikanë u liruan në këmbim të një talibani të rëndësishëm, i cili ishte i dënuar me burg të përjetshëm për trafikim të narkotikëve dhe terrorizëm, kanë njoftuar zyrtarët të martën, ka raportuar agjencia e lajmeve Associated Press.
Talibanët vlerësuan marrëveshjen si hap drejt “normalizimit të marrëdhënieve” me SHBA-në, por kjo nuk ka shpresë se mund të jetë një hap shumë i madh, pasi shumë vende ende nuk e njohin regjimin taliban.
Ministria e Jashtme e talibanëve në Kabul ka konfirmuar shkëmbimin, duke shtuar se dy qytetarë amerikanë të paidentifikuar janë këmbyer për Khan Mohammed, i cili ishte dënuar me dy herë me burgim të përjetshëm në vitin 2008.
Familja e Ryan Corbettm, njëri nga amerikanët e mbajtur nga talibanët, ka konfirmuar se ai është liruar. Corbett, ka jetuar në Afganistan me familjen e tij në kohën e rënies së qeverisë së mbështetur nga SHBA-ja në Afganistan, dhe ishte arrestuar në gusht të 2022-tës gjatë një udhëtimi biznesi.
Familja Corbett ka falënderuar Katarin për ndihmë. Katari i cili ka ndërmjetësuar negocimin në mes SHBA-së dhe talibanëve për shumë vjet, nuk është përgjigjur në kërkesën për koment.
Përmes burimeve jozyrtare CNN dhe New York Times, kanë identifikuar të liruarin e dytë si William McKenty, por nuk ka detaje për të apo për prezencën e tij në Afganistan.
Khan Mohammed ishte arrestuar në fushëbetejë në provincën Nangarhar të Afganistanit dhe më vonë është dërguar në SHBA, pasi një gjykatës federal e kishte akuzuar për trafikimin e heroinës për në SHBA.
Departamenti i Drejtësisë i ishte referuar Khan Mohammedit si “një xhihadist i dhunshëm dhe trafikant narkotikësh” i cili “ka dashur të vrasë ushtarë amerikanë në Afganistan duke përdorur raketa”. Ai ishte personi i parë i cili ishte dënuar bazuar në ligjet për narkoterrorizëm.
