Sulmi i Izraelit në një ndërtesë në Gaza ua merr jetën 29 personave

Të paktën 29 persona kanë mbetur të vdekur prej një sulmi ajror izraelit mbi një ndërtesë banimi në pjesën lindore të qytetit të Gazës, transmeton BBC.

Agjencia e mbrojtjes civile, që udhëhiqet prej grupit militant palestinez Hamas, ka thënë se avionët ushtarakë kanë shënjestruar zona afër xhamisë al-Hawashi në lagjen Shejaiya të martën në mëngjes.

Sipas njoftimit të agjencisë, rreth 40 persona kanë mbetur të lënduar dhe se ekipet e shpëtimit akoma po kërkojnë për trupa nën rrënoja.

Nga ana tjetër, ushtria izraelite (IDF) ka thënë se ka goditur një “terrorist të lartë të Hamasit” i cili ishte përgjegjës për planifikimin dhe ekzekutimin e sulmeve në atë zonë.

“Shumë hapa u morën për të reduktuar dëmet ndaj civilëve, përfshirë përdorimin e armëve precize”, thuhet më tutje në njoftimin e IDF-së.

Ushtria izraelite ka akuzuar në mënyrë të vazhdueshme Hamasin për shkeljen e të drejtës ndërkombëtar, pasi që sipas saj, Hamasi është duke përdorur qëllimisht popullatën civile si mburoja njerëzore.

Izraeli rifilloi operacionet ushtarake në Rripin e Gazës me një seri të fuqishme sulmesh ajrore më 18 mars dhe dërgoi përsëri ushtrinë pas armëpushimit të përkohshëm me Hamasin, gjatë të cilit u liruan 38 pengje në këmbim të qindra të burgosurve palestinezë.