Të paktën shtatë persona kanë humbur jetën në një sulm me bombë në treg në veri të Sirisë, raporton “BBC”.
Në sulmin që ndodhi të dielën në qytetin Azaz në provincën Aleppo, u lënduan dhe disa persona tjerë.
Është e paqartë se kush e kreu sulmin në qytetin që drejtohet nga milicia pro-turke që e lufton presidentin sirian Bashar al-Assad.
Grupet pro-turke kontrollojnë pjesë të mëdha të territorit në Siri përgjatë kufirit mes dy shteteve.
Kur shpërtheu bomba, e cila ishte e vendosur në një veturë, tregu ishte i ngarkuar me blerës që po blinin rroba të reja për fëmijët e tyre para festës së Fitër Bajramit.
“Helmetat e Bardha”, një grup i vullnetarëve që punojnë në Siri, ka njoftuar se dy fëmijë janë në mesin e viktimave.
Në xhirime janë parë trupa të shtrirë në tokë, ndërtesa të dëmtuara dhe një veturë duke u djegur.
