Sllovakia synon rritjen e sigurisë për politikanët pas plagosjes së Ficos

Qeveria e Sllovakisë miratoi të mërkurën një paketë masash që synojnë të rrisin sigurinë për politikanët kryesorë dhe të tjerët, pas një atentati ndaj kryeministrit populist, Robert Fico.

Masat kanë nevojë për miratim nga Parlamenti, ku qeveria e koalicionit trepalësh ka shumicën, raporton AP.

Një propozim thotë se autoritetet do të kenë të drejtën të ndalojnë protestat përpara shtëpive të politikanëve. Demonstratat gjithashtu nuk do të lejohen brenda 50 metrave nga selia e qeverisë dhe presidentit.

Ministria e Brendshme do të identifikonte dhe do të përgatiste rezidenca afatgjata për kryeministrin, presidentin dhe kryetarin e parlamentit.

Mbrojtja do të sigurohet edhe për liderët e të gjitha partive politike të përfaqësuara në Parlament, prokurorin e përgjithshëm dhe kryegjyqtarin në Gjykatën Kushtetuese.

Kryeministrat dhe kryetarët e parlamenteve që kanë shërbyer të paktën dy mandate do të marrin një pagesë të rregullt pas përfundimit të mandatit të tyre. Përfitimi aktualisht ofrohet vetëm për ish-presidentët.

Fico, i cili mori detyrën vitin e kaluar duke bërë fushatë me një platformë pro-ruse dhe anti-SHBA, është rikuperuar pasi u qëllua me armë zjarri në bark, teksa po përshëndeste mbështetësit më 15 maj në qytetin Handlova.