Si do të zhvillohet inaugurimi i Trumpit?

Dita e inaugurimit të Donald Trumpit për herë të dytë si president i SHBA-së do të nisë me një shërbim në Kishën e Shën Gjonit, një kishë historike në Washington DC, e ndjekur nga pirja e çajit në Shtëpinë e Bardhë.

Shfaqjet muzikore dhe fjalët e hapjes janë caktuar të fillojnë në orën 09:30 (15:30 me kohën lokale të Kosovës).

Kjo do të pasohet nga betimi i Trumpit dhe J.D.Vance brenda hapësirës rrethore të Kapitolit në orën 11:47 (17:47 me kohën lokale të Kosovës). 

Secili nga të dy do të vendosë dorën e tij mbi një libër, zakonisht por jo gjithmonë, një Bibël, dhe do të thotë betimin e detyrës.

Këtë vit, Trumpi do të përdorë një Bibël personale që i është dhënë nga nëna e tij në vitin 1955 dhe Biblën historike të Lincoln, i përdorur në inaugurimin e presidentit Abraham Lincoln në vitin 1861.

Komiteti Inaugurues i Trump- Vance ka thënë se edhe Vance do të betohet gjithashtu me një Bibël personale, një kopje familjare që i përkiste stërgjyshes së tij nga nëna.

Më pas, Trumpi do të mbajë fjalimin inaugurues në të cilin presidenti do të përcaktojë qëllimet e tij për katër vjetët e ardhshme. Tema e fjalimit të tij thuhet se do të jetë uniteti, forca dhe drejtësia.

Trumpi më pas do të shkojë në dhomën e Presidentit, pranë dhomës së Senatit, për të nënshkruar dokumentet kryesore.

Më pas ai do të marrë pjesë në një drekë të organizuar nga Komiteti i Përbashkët i Kongresit për Ceremonitë Inauguruese.

Kjo zakonisht pasohet nga një paradë që nis nga ndërtesa e Kapitolit poshtë Pennsylvania Avenue në Shtëpinë e Bardhë. Megjithatë, kjo është anuluar, për shkak të motit.

Më vonë në mbrëmje, Trumpi do të shfaqet në tri ballot inauguruese në të gjithë qytetin: Ballon e Komandantit të Përgjithshëm, Ballon Inaugurues të Lirisë dhe Ballin “Starlight”. Ai pritet të flasë në të tri ballot.

Gjatë ditës së tij të parë të pushtetit, Trumpi pritet të nënshkruajë më shumë se 200 urdhra ekzekutivë. Kjo do të përfshijë urdhra ekzekutivë, të cilët janë ligjërisht të detyrueshëm, dhe direktiva të tjera presidenciale si shpalljet, të cilat zakonisht nuk janë.

Një urdhër ekzekutiv është një urdhër me shkrim i lëshuar nga presidenti për qeverinë federale, i cili nuk kërkon miratimin e Kongresit.