-
Përktheu:
Forca Jashari
- 21 maj 2024 16:19
- Shpërndaje në:
Shtatë palestinezë, duke përfshirë një mjek, janë vrarë nga forcat izraelite gjatë një operacioni në Jenin, në veri të Bregut të pushtuar Perëndimor, kanë bërë të ditur autoritetet e vendit.
Të plagosur kanë mbetur nëntë persona të tjerë, dy prej të cilëve në gjendje të rëndë, raporton BBC.
Doktori Aseed Jabareen, kirurg 50-vjeçar, është qëlluar për vdekje gjatë rrugës për në punë, sipas Ministrisë së Shëndetësisë së vendit.
Mediat palestineze kanë raportuar po ashtu se në mesin e viktimave është edhe një 9-vjeçar i cili u vra teksa po udhëtonte me biçikletë.
Forcat e Mbrojtjes të Izraelit (IDF) kanë thënë se po kryejnë një operacion në Jenin ndaj personave të armatosur.
“Forcat izraelite të sigurisë aktualisht po kryejnë një operacion kundër terrorizmit në zonën e Jeninit. U identifikuan sulme ndaj personave të armatosur në zonë”, ka deklaruar IDF-ja.
Sipas OKB-së, të paktën 480 palestinezë janë vrarë si pasojë e incidenteve të lidhura me konfliktin në Bregun Perëndimor, duke përfshirë Jerusalemin Lindor.
Dhjetë izraelitë, duke përfshirë gjashtë anëtarë të forcave të sigurisë, janë vrarë gjithashtu.
