Shpërthen vullkani në Islandë, evakuohen banorët dhe turistët

Turistët dhe banorët janë evakuuar pasi një vullkan ka shpërthyer në jugperëndim të Islandës, duke kërcënuar një qytet dhe një atraksion popullor.

Vullkani ka nxjerrë llavë dhe tym që kur shpërthimi ka nisur në mëngjes, duke krijuar një çarje të madhe në tokë e cila është rritur në 1.2 km gjatësi, raporton BBC.

Tërmete të shumta kanë ndodhur në zonën vullkanike gjatë gjithë ditës.

Vullkani është afër qytetit të peshkimit të Grindavik dhe banjës së famshme Blue Laguna. Një numër i vogël njerëzish refuzuan të evakuonin qytetin, raportuan mediat lokale.

Njerëzve iu kërkua "të largoheshin nga zona e rrezikut", ka thënë komisioneri i policisë së rajonit, Ulfar Ludviksson për transmetuesin RUV të Islandës. 

Kishte frikë se qyteti ishte "në rrezik që rrjedhat e llavës të hynin në zonën e banuar", sipas Rikke Pedersen nga Qendra Vullkanologjike Nordike.

Barrierat mbrojtëse rreth Grindavik janë thyer gjithashtu, pasi një çarje e re shpërthyese është hapur disa qindra metra brenda. Por aktiviteti vullkanik është lehtësuar në orët e para të pasdites të së martës.

Rrugët brenda dhe jashtë qytetit mbeten të mbyllura, por fluturimet aktualisht nuk janë prekur.

Shumica e 4.000 banorëve të Grindavikut janë larguar në një evakuim masiv në vitin 2023 për shkak të rreziqeve të aktivitetit vullkanik. Që atëherë, vullkani ka shpërthyer disa herë.