Shiu dhe përmbytjet rikthehen në Valencia

Shiu i rrëmbyeshëm dhe përmbytjet janë rikthyer në rajonin e Valencias në Spanjë, të mërkurën mbrëma.

Më shumë se 220 njerëz vdiqën në këtë zonë bregdetare lindore, dhe qyteti Paiporta u godit më rëndë me humbjen e 60 jetëve, pasi zona u përball me përmbytje të rënda dy javë më parë, raporton BBC.

Edhe pse shumica dërrmuese e shtëpive janë ende në këmbë, ka mungesë të energjisë elektrike, ujit të nxehtë apo të pijshëm në rrugët që u goditën më keq.

Në Paiporta, grumbuj veturash të dëmtuara janë krijuar në rrethrrotullime dhe në hapësira të tjera.

Vlerësohet se rreth 100,000 automjete janë shkatërruar gjatë përmbytjeve.

Kryebashkiaku u ka kërkuar njerëzve që të qëndrojnë brenda, pasi popullata vendase pret që alarmi i fundit për përmbytjet të ulet.