SHBA-ja e Rusia shkëmbejnë të burgosur

Një qytetare ruso-amerikane është liruar nga burgu si rezultat i marrëveshjes së fundit për shkëmbimin e të burgosurve ndërmjet Washingtonit dhe Moskës, raporton BBC.

Balerina Ksenia Karelina, banore në Los Angeles, kishte qenë e burgosur në Rusi për më shumë se një vit, pasi që ishte arrestuar në qytetin e Yekaterinburg në fillim të vitit 2024.

Ajo ishte shpallur fajtore për tradhti, për shkak se i kishte dhuruar para një organizate bamirëse me seli në Shtetet e Bashkuara të Amerikës, që dërgonte ndihma humanitare në Ukrainë. Gjykata e kishte dënuar atë me 12 vjet burgim. 

Gjatë shkëmbimit, raportohet se SHBA-ja e ka liruar Arthur Petrovin. I njëjti ka nënshtetësi të dyfishtë gjermano-ruse. Ai ishte arrestuar në Qipro në vitin 2023. 

Shkëmbimi i të burgosurve ndodhi në Abu Dhabi në orët e para të së enjtes.