Sarkozy del para gjyqit nën dyshimin për financim të paligjshëm nga Gaddafi

Ish-presidenti francez, Nicolas Sarkozy do të dalë në gjyq të hënën për skandalin më të madh të financimit politik në historinë moderne franceze, në të cilin ai dyshohet se ka marrë miliona euro financime të paligjshme për fushatën zgjedhore nga regjimi i diktatorit të ndjerë libian, Muammar Gaddafi.

Gjyqi historik i ish-presidentit francez të krahut të djathtë dhe 12 personave të tjerë, përfshirë tre ish-ministra të qeverisë, për konspiracion kriminal për të marrë fonde nga një diktator i huaj në një shkallë masive, kërcënon të përkeqësojë besimin tashmë të ulët të votuesve në klasën politike franceze, raporton The Guardian.

Pas një hetimi 10-vjeçar kundër korrupsionit, gjykata do të dëgjojë akuzat për atë që hetuesit e quajtën një "pakt korrupsioni" midis Sarkozy-t dhe regjimit libian, në të cilin ndërmjetësit dërguan valixhe plot me para në ndërtesat e ministrive në Paris për të financuar në mënyrë të paligjshme fitoren e Sarkozyt, në fushatën presidenciale të vitit 2007.

Gjykata do të shqyrtojë nëse, në këmbim të financimit të fushatës presidenciale të Sarkozyt, regjimi libian ka kërkuar favore diplomatike, ligjore dhe biznesi.

Një nga këto kërkesa të supozuara për favore lidhej me Abdullah al-Senussi, shefin dhe zbatuesin e spiunazhit të Gaddafit. 

Senussi ishte dënuar në mungesë me burgim të përjetshëm nga një gjykatë franceze në vitin 1999 për rolin e tij në bombardimin e vitit 1989 të një avioni pasagjerësh UTA mbi Niger, i cili vrau 170 njerëz.

Gjykata do të dëgjojë argumentet se si janë bërë kërkesa nga regjimi libian ndaj Sarkozyt për të gjetur një mënyrë për të hequr urdhërarrestin ndërkombëtar të Francës kundër Senussit.

Sarkozy, i cili ishte president midis viteve 2007 dhe 2012, ka mohuar të gjitha keqbërjet në këtë rast.

Gjyqi tremujor do të zgjidhë marrëdhëniet komplekse të Sarkozyt me Gaddafin, liderin autokratik libian, sundimi brutal 41-vjeçar i të cilit u karakterizua nga abuzime të të drejtave të njeriut dhe i cili ishte izoluar ndërkombëtarisht për lidhjen e regjimit të tij me terrorizmin.