Rusia sulmon Kievin, të paktën një i vdekur

Rusia ka nisur sulme me raketa dhe drone në disa rajone të Ukrainës gjatë natës, duke vrarë të paktën një person në Kiev.

Kryetari i bashkisë së Kievit, Vitali Klitschko, ka thënë të dielën se një trup i një personi është gjetur nën rrënojat pasi sulmet me raketa ruse në kryeqytet shkaktuan zjarre në disa rrethe, duke dëmtuar ndërtesa dhe automjete, raporton AP.

Zjarret kanë shpërthyer në zona jo-rezidenciale të rretheve Obolonskyi, Darnytskyi dhe Solomianskyi.

Tre persona janë plagosur në Darnytskyi.

Shërbimet e urgjencës ukrainase kanë raportuar se një ndërtesë banimi është goditur në rajonin e Mykolaivit, duke plagosur tre persona.

Në përgjithësi, trupat ruse kanë gjuajtur 23 raketa dhe 109 dronë sulmues dhe mashtrues në Ukrainë gjatë natës, kanë njoftuar forcat ajrore. 

Ushtria pretendon se ka rrëzuar 13 raketa, 40 dronë dhe ka bllokuar 53 të tjera.