Rusia drejt njohjes së talibanëve dhe kryengritësve sirianë

Parlamenti rus ka miratuar një ligj të martën që do t'i lejojë gjykatat të pezullojnë ndalimet për grupet e përcaktuara nga Moska si organizata terroriste, duke i hapur rrugën asaj për të normalizuar lidhjet me talibanët afganë dhe potencialisht me udhëheqjen e re të Sirisë.

Asnjë vend nuk e njeh aktualisht qeverinë talibane në Afganistan, e cila mori pushtetin në gusht të vitit 2021, ndërsa forcat e udhëhequra nga SHBA-ja organizuan një tërheqje kaotike pas 20 vitesh luftë, raporton Reuters.

Por Rusia ka ndërtuar gradualisht lidhje me lëvizjen, për të cilën presidenti Vladimir Putin ka thënë në korrik se tani është një aleate në luftën kundër terrorizmit.

Udhëheqësi i rajonit mysliman të Çeçenisë në Rusi, Ramzan Kadyrov, ka bërë thirrje të hënën për heqjen e grupit sirian Hayat Tahrir al-Sham nga lista e grupeve terroriste të Moskës. HTS-ja ka udhëhequr përmbysjen e presidentit sirian, Bashar al-Assad këtë muaj.

Kadyrov, një aleat i ngushtë i Putinit, ka thënë se Rusia kishte nevojë për lidhje me autoritetet e reja siriane për të siguruar stabilitet dhe për të parandaluar një katastrofë humanitare. Kremlini ka thënë këtë javë se Rusia është në kontakt me udhëheqjen e re në Siri, ku shpreson të ruajë përdorimin e një aeroporti dhe një baze detare që i japin asaj një bazë të rëndësishme ushtarake në Mesdhe.

Ligji i ri, i miratuar nga dhoma e ulët e parlamentit, Duma e Shtetit, lejon që një grup të hiqet nga lista e ndaluar e Rusisë me urdhër të një gjykate nëse pushon veprimtarinë e lidhur me terrorizmin.

Talibanët janë të parët në grupin e krijuar në shkurt të vitit 2003, teksa HTS-ja e Sirisë është shtuar në vitin 2020.