-
Përktheu:
Blerta Haxhiu
- 30 nëntor 2024 12:50
- Shpërndaje në:
Forcat rebele në Siri kanë marrë nën kontroll "shumicën" e qytetit të dytë më të madh të vendit, Alepo, sipas grupit monitorues me bazë në Mbretërinë e Bashkuar, Observatori Sirian për të Drejtat e Njeriut (SOHR).
Rusia nisi sulme ajrore në pjesë të Alepos gjatë natës deri të shtunën për herë të parë që nga viti 2016.
SOHR bëri të ditur se më shumë se 300 njerëz - duke përfshirë më shumë se 20 civilë - janë vrarë që nga fillimi i ofensivës të mërkurën.
Ofensiva është më e madhja kundër qeverisë siriane në vite dhe hera e parë që rebelët që luftojnë forcat e presidentit Bashar al-Assad kanë arritur në Alepo që kur u detyruan të largoheshin nga ushtria në vitin 2016.
Aeroporti i Alepos dhe të gjitha rrugët që të çojnë në qytet janë mbyllur, thanë burime ushtarake për agjencinë e lajmeve Reuters.
Rebelët ishin në gjendje të kapnin “shumicën e qytetit” pa hasur rezistencë të konsiderueshme, tha SOHR herët të shtunën.
Nuk pati luftime pasi forcat e regjimit sirian u tërhoqën, tha një zëdhënës për BBC.
Më herët të premten, forcat qeveritare thanë se kishin rifituar pozicionet në një numër qytetesh në provincat Alepo dhe Idlib.
