Putini i gatshëm të ndihmojë në arritjen e paqes ndërmjet Azerbajxhanit dhe Armenisë

Rusia është e gatshme të "bëjë gjithçka" për të ndihmuar Azerbajxhanin dhe Armeninë për të nënshkruar një marrëveshje paqeje, i ka thënë presidenti rus, Vladimir Putin homologut të tij azerbajxhanas, Ilham Aliyev në një takim dypalësh në Baku të hënën. 

Putin ka thënë se në kohën e duhur do të komunikonte edhe me kryeministrin armen, Nikol Pashinyan.

Armenia dhe Azerbajxhani kanë rënë dakord në dhjetor të vitit 2023 të shkëmbejnë robër lufte dhe të punojnë drejt nënshkrimit të një traktati paqeje në atë që Bashkimi Evropian e përshëndeti si një hap të madh drejt paqes në rajonin e trazuar prej kohësh. 

Azerbajxhani zhvilloi një fushatë të rrufeshme ushtarake në shtator 2023 në rajonin separatist të Nagorno-Karabakh. 

Ofensiva i dha fund sundimit prej tre dekadash atje nga armenët etnikë dhe rezultoi në largimin e shumicës dërrmuese të 120,000 banorëve nga rajoni, i cili njihet ndërkombëtarisht si pjesë e Azerbajxhanit.

Deri më tani, të dy vendet kishin debatuar ashpër mbi skicën e një procesi paqeje mes mosbesimit të ndërsjellë.

Armiqësitë përkeqësuan një situatë tashmë të zymtë humanitare për banorët që ishin përballur me mungesë ushqimi dhe ilaçesh për muaj të tërë, ndërsa Azerbajxhani detyroi një bllokadë të rrugës që lidh Nagorno-Karabakun me Armeninë.

Lëvizja e Azerbajxhanit për të rimarrë kontrollin mbi Nagorno-Karabakun kishte ngritur shqetësime se një luftë në shkallë të gjerë në rajon mund të rifillonte mes dy fqinjëve, të cilët janë përfshirë në një luftë për Nagorno-Karabakun që nga përfundimi i një lufte separatiste atje në vitin 1994.

Konflikti ka tërhequr prej kohësh lojtarë të fuqishëm rajonalë, përfshirë Rusinë dhe Turqinë. Ndërsa Rusia mori rolin ndërmjetësues, Turqia hodhi peshën e saj pas aleatit të vjetër Azerbajxhan.

Rusia ka qenë partneri dhe aleati kryesor ekonomik i Armenisë që nga rënia e Bashkimit Sovjetik në vitin 1991 dhe ka një bazë ushtarake në vend.