-
Përktheu:
Flutura Gashi-Mehmeti
- 23 qershor 2024 09:37
- Shpërndaje në:
Një port i përkohshëm i ndërtuar nga ushtria amerikane për dërgesat humanitare nga deti në Gaza, është dëshmuar se është i brishtë përballë detit të trazuar më shumë se sa pritej, dhe e ardhmja e të gjithë projektit prej 230 milionë dollarësh tani është në pikëpyetje.
Porti ka qenë i përdorshëm për vetëm 12 ditë që kur filloi funksionimin më 17 maj.
Në shumicën e atyre ditëve ndihma e ardhur nga deti është dashur të lihet në plazh pasi nuk ka pasur kamionë për ta shpërndarë në magazina në Gaza, për shkak të mungesës së sigurisë, raporton The Guardian.
Porti ka mbetur shumë larg pritjeve fillestare. Kur presidenti amerikan, Joe Biden e shpalli atë në fjalimin e tij të sindikatave më 7 mars, kishte thënë se skela përkohshme "do të mundësonte një rritje masive të sasisë së ndihmës humanitare që hyn në Gaza çdo ditë".
U deshën më shumë se dy muaj dhe rreth 1,000 ushtarë dhe marinarë për ndërtimin e tij.
Megjithatë, gjatë gjithë rrjedhës së funksionimit të portit deri më tani, vetëm rreth 250 kamionë me ushqime dhe ndihma të tjera humanitare (4,100 ton) kanë mbërritur nga korridori detar i planifikuar, më pak se gjysma e asaj që do të kalonte në Gaza në një ditë të vetme përpara lufte.
Që kur 274 palestinezë u vranë nga forcat e mbrojtjes izraelite gjatë një misioni të shpëtimit të pengjeve më 8 qershor, Programi Botëror i Ushqimit (WFP) ka pezulluar autokolonat që supozohej të çonin paletat e ndihmave për më shumë se 2.3 milionë njerëz të Gazës të cilët ndodhen nën bombardime dhe përballë krizës së urisë.
WFP-ja thotë se rishikimi i saj i sigurisë është ende në progres.
