Zyrtarë të lartë ukrainas si dhe agjencia koreano-jugore për inteligjencë paralajmëruan se Koreja Veriore veçse ka dërguar ushtarë për të luftuar me Rusinë në tokat ukrainase. Ministrat e Jashtëm të Francës dhe Ukrainës theksuan se një hap i tillë do të krijonte një situatë edhe më përshkallëzuese. Edhe presidenti Volodymyr Zelensky e quajti trajnimin e rreth 10 mijë ushtarëve koreano-veriorë për angazhim në radhët e ushtrisë ruse, si me rrezik të jashtëzakonshëm përshkallëzimi të situatës në terren
Përfshirja e ushtarëve të Koresë Veriore në mbështetje të pushtimit rus në Ukrainë do të përbënte përshkallëzim serioz të luftës, paralajmëruan ministrat e Jashtëm të Francës dhe të Ukrainës, në një konferencë të përbashkët shtypi në Kiev. Zyrtarë të lartë ukrainas si dhe agjencia koreano-jugore për inteligjencë paralajmëruan se Koreja Veriore veçse ka dërguar ushtarë për të luftuar me Rusinë në Ukrainë.
Këtë, ministri francez Jean-Noel Barrot e kualifikoi si një zhvillim që mund ta përshkallëzojë seriozisht dhe ta hapë një fazë të re në luftë.
E presidenti ukrainas, Volodymyr Zelenskyy, e quajti trajnimin e rreth 10 mijë ushtarëve koreano-veriorë për angazhim në radhët e ushtrisë ruse si me rrezik të jashtëzakonshëm përshkallëzimi të situatës në terren.
Megjithëkëtë, shefi i ri i Përgjithshëm i NATO-s, Mark Rutte, ka thënë më herët se nuk ka prova për përfshirjen e Fenianit zyrtar në luftën në Ukrainë.
Moska e Feniani kanë thelluar bashkëpunimin gjatë muajve të fundit. Presidenti rus, Vladimir Putin, gjatë javës e prezantoi për ratifikim një pakt të dakorduar me homologun koreano-verior, Kim Jong-Un, me të cilin jepet zotimi se Rusia e Koreja Veriore do të ndihmojnë njëra-tjetrën në rast të “agresionit” ndaj cilitdo shtet.
E ministri i Jashtëm i Francës u zotua për mbështetjen e tij për planin e Ukrainës për t’i dhënë fund luftës me Rusinë, duke u thënë gazetarëve në Kiev të shtunën se do të punojë me zyrtarët ukrainas për të siguruar mbështetjen e vendeve të tjera për propozimin.
I zbuluar nga presidenti ukrainas Volodymyr Zelenskyy në fillim të kësaj jave, “plani i fitores” i Kievit shpreson ta detyrojë Rusinë t’i japë fund pushtimit të saj të Ukrainës, përmes negociatave.
Propozimi po shqyrtohet nga partnerët perëndimorë të Ukrainës, ndihma e të cilëve është jetike për Kievin për t’i rezistuar fqinjit të tij më të madh. Një element kyç do të ishte një ftesë formale në NATO, të cilën mbështetësit perëndimorë kanë hezituar ta marrin në konsideratë deri pas përfundimit të luftës.
“Një fitore ruse do të ishte një përkushtim për ligjin e më të fortëve dhe do ta shtynte rendin ndërkombëtar drejt kaosit”, tha ministri i Jashtëm francez Jean-Noel Barrot në një konferencë të përbashkët shtypi me homologun ukrainas Andrii Sybiha.
Qëkur Rusia nisi pushtimin më 24 shkurt 2022, Franca ka qenë një nga mbështetësit më të vendosur ushtarakë, diplomatikë dhe ekonomikë të Ukrainës.
Presidenti francez Emmanuel Macron gjithashtu ka nxitur më parë për një ndryshim të politikës nga aleatët perëndimorë në mënyrë që bazat ushtarake brenda Rusisë, Ukraina të mund të godasë me armë të sofistikuara me rreze të gjatë veprimi, të ofruara nga partnerët perëndimorë, përfshirë raketat nga Franca.
E Barrot njoftoi gjithashtu se Franca do ta dorëzojë grupin e parë të avionëve luftarakë “Mirage 2000” në Ukrainë në tre muajt e parë të vitit 2025, me pilotët dhe mekanikët ukrainas të trajnuar gjithashtu për të fluturuar dhe mirëmbajtur ata.
