-
Përktheu:
Flutura Gashi-Mehmeti
- 7 maj 2024 14:05
- Shpërndaje në:
Shërbimi ukrainas i sigurisë (SBU) thotë se ka penguar një komplot rus për të vrarë presidentin Volodymyr Zelensky dhe zyrtarë të tjerë të rangut të lartë ukrainas.
Dy kolonelë të njësisë së mbrojtjes së qeverisë ukrainase janë arrestuar lidhur me dyshimin për komplot.
SBU-ja ka thënë se ata ishin pjesë e një rrjeti agjentësh që i përkisnin shërbimit rus të sigurisë shtetërore (FSB).
Ata thuhet se kishin kërkuar për “ekzekutues” të gatshëm midis truprojave të Zelenskyt, për ta rrëmbyer dhe vrarë atë.
Qëkur parashutistët rusë u përpoqën të zbarkonin në Kiev dhe të vrisnin presidentin Zelensky në orët dhe ditët e para të pushtimit në shkallë të gjerë, komplotet për ta vrarë atë kanë qenë të zakonshme.
Udhëheqësi ukrainas ka thënë në fillim të pushtimit se ai ishte “objektivi numër një i Rusisë”.
Por ky komplot i supozuar dallon nga të tjerët. Ai përfshin shërbimin e kolonelëve, detyra e të cilëve ishte të ruanin zyrtarët dhe institucionet.
Objektivat e tjera përfshinin kreun e inteligjencës ushtarake, Kyrylo Budanov, dhe shefin e SBU-së, Vasyl Malyuk, shtoi agjencia.
Grupi thuhet se kishte planifikuar të vriste Budanov përpara Pashkëve Ortodokse, e cila këtë vit ishte më 5 maj.
Sipas SBU-së, komplotistët synonin të merrnin informacion rreth vendndodhjes së Zelenskyt, të cilin më pas do ta sulmonin me raketa, dronë dhe granata antitanke.
Një nga oficerët që u arrestua më vonë kishte blerë tashmë dronë dhe mina kundër personelit, ka thënë SBU-ja.
Kreu i SBU-së, Vasyl Malyuk, ka thënë se sulmi supozohej të ishte “një dhuratë për Putinin përpara inaugurimit” - duke iu referuar Vladimir Putinit të Rusisë, i cili u betua për një mandat të pestë si president në Kremlin të martën.
“Operacioni u shndërrua në një dështim të shërbimeve speciale ruse. Por ne nuk duhet të harrojmë – armiku është i fortë dhe me përvojë, ai nuk mund të nënvlerësohet”, ka deklaruar Malyuk.
Dy zyrtarët ukrainas po mbahen nën dyshimin për tradhti dhe përgatitje të një akti terrorist.
SBU-ja ka thënë se tre punonjës të FSB-së mbikëqyrën organizatën dhe sulmin.
Njëri prej tyre, i quajtur si Dmytro Perlin, kishte mbledhur të dhëna që përpara pushtimit të plotë të Ukrainës nga Rusia, në shkurt të vitit 2022.
Një tjetër punonjës i FSB-së, Oleksiy Kornev, thuhet se ka mbajtur takime “konspirative” “në shtetet fqinje evropiane” përpara pushtimit me një nga kolonelët ukrainas të arrestuar.
Gjatë marrjes në pyetje të njërit prej të dyshuarve, ata dëgjohen të përshkruajnë se si janë paguar mijëra dollarë direkt ose indirekt përmes të afërmve të tyre. Nuk dihet nëse ai po fliste nën presion apo jo.
Hetuesit këmbëngulin se ata i monitoruan burrat gjatë gjithë kohës. Nuk ka informata se sa afër ishin ata për ta realizuar planin e tyre të supozuar.
Muajin e kaluar një polak u arrestua dhe u akuzua për planifikimin e bashkëpunimit me shërbimet e inteligjencës ruse për të ndihmuar një vrasje të mundshme të Zelenskyt.
Në fundjavë presidenti i Ukrainës u shfaq në listën e të kërkuarve të Ministrisë së Brendshme ruse me akuza të paspecifikuara.
Ministria e Jashtme në Kiev e dënoi masën duke treguar “dëshpërimin e makinës shtetërore ruse dhe propagandës” dhe vuri në dukje se Gjykata Ndërkombëtare Penale kishte lëshuar një urdhër për arrestimin e Vladimir Putinit.
