-
Përktheu:
Flutura Gashi-Mehmeti
- 20 nëntor 2024 17:55
- Shpërndaje në:
Të paktën një person ka vdekur si pasojë e një stuhie që po godet rajonin në brigjet e SHBA-së veri-perëndimore dhe Kanadasë perëndimore, duke shkaktuar erëra të forta, përmbytje dhe borë për mbi shtatë milionë banorë që jetojnë në shtetet përgjatë Oqeanit Paqësor.
Stuhia ka shkaktuar ndërprerje të shumta të energjisë elektrike për qindra mijëra amerikanë dhe erërat e forta të saj kanë rrëzuar pemë, raporton BBC.
"Cikloni bombë", siç e quajnë sinoptikanët, është shkaktuar nga presioni i ajrit që bie shpejt në bregdet, gjë që ka intensifikuar me shpejtësi sistemin e motit.
Pasojat e stuhisë u panë të mërkurën në mëngjes, duke bërë që pemët të rrëzohen dhe të shkaktojnë dëme nëpër shtëpi e të bllokojnë rrugët në shtetin e Washingtonit.
Një grua vdiq kur një pemë ra në një kamp të të pastrehëve në Lynwood, në veri të Seattle, Washington, sipas një postimi në mediat sociale nga Departamenti i Zjarrfikësve të Qarkut Jugor.
Erërat e forta po çojnë në ndërprerje të energjisë elektrike. Të mërkurën në mëngjes, më shumë se 600,000 shtëpi në Washington ishin pa energji elektrike, sipas poweroutage.us. Rreth 15,000 klientë po përjetojnë ndërprerje në Kaliforni.
Disa shkolla në Washington pritet të mbyllen ose të përballen me ndërprerje.
Në Kaliforninë veriore, Qendra Amerikane e Parashikimit të Motit (WPC) ka paralajmëruar se ekziston një rrezik i lartë i reshjeve të tepërta dhe paralajmëroi për përmbytje të shpejta dhe rrëshqitje dheu.
Gjiri i San Franciskos pritet të ketë deri në 20 cm shi.
Stuhia është shtrirë edhe në Kanada, ku era e fortë është shqetësimi kryesor.
