Një i vdekur dhe nëntë të lënduar në Kolumbi pasi një kabinë teleferiku bie në tokë

Një person ka vdekur dhe nëntë të tjerë janë lënduar pasi një kabinë e teleferikut me 10 persona ka rënë nga një stacion në qytetin kolumbian të Medellin, kanë bërë të ditur autoritetet.

Raportet lokale thanë se aksidenti ndodhi rreth orës 04:30 me orën lokale, në linjën K të rrjetit të teleferikut “Metrocable” të qytetit.

Dhjetëra njerëz u raportuan të bllokuar në kabinat të cilat u ndaluan midis stacioneve, raporton BBC.

“Metrocable”, i cili u hap në vitin 2004, ishte rrjeti i parë i transportit publik i këtij lloji.

Viktima është një 55-vjeçar.

Pamjet në mediat lokale treguan njerëz të shtrirë në tokë.

Carlos Quintero, kreu i agjencisë së reagimit ndaj katastrofave në Medellin, ka thënë për mediat lokale se një kabinë ishte ndalur kur hyri në stacion dhe ishte goditur nga kabina e mëposhtme, e cila më pas "është shkëputur dhe ka rënë në trotuar".

“Metrocable” përbëhet nga gjashtë linja dhe 20 stacione. Ajo lidh zonat me të ardhura të ulëta të qytetit të shtrira në kodra të pjerrëta, me qendrën.