Netanyahu shpërbën kabinetin e luftës

Kryeministri izraelit, Benjamin Netanyahu, ka shpërbërë të hënën kabinetin izraelit të luftës që kishte mbikëqyrur konfliktin në Gaza, duke kundërshtuar aleatët e tij të së djathtës ekstreme që po kërkonin vende aty.

Veprimi i Netanyahut po shihet edhe si lëvizje për të forcuar zotërimin e tij në vendimmarrje mbi luftimet me Hamasin në Gaza dhe Hezbollahun në të gjithë kufirin libanez, raporton The Guardian.

Kryeministri i njoftoi për vendimin edhe ministrat, duke thënë se kabineti i luftës ishte krijuar si pjesë e një marrëveshjeje në të cilën politikani i moderuar Benny Gantz dhe partia e tij e unitetit kombëtar iu bashkuan një koalicioni emergjent vitin e kaluar.

Meqë Gantz ka dhënë dorëheqjen një javë më parë, thuhet se Netanyahu u tha ministrave, se kabineti i luftës nuk ishte më i nevojshëm.

Gantz, një nga anëtarët e kabinetit të luftës, është larguar nga koalicioni së bashku me Gadi Eisenkot, një nga tre vëzhguesit në trup.

Netanyahu tani pritet të zhvillojë konsultime për luftën në Gaza me një grup të vogël ministrash, duke përfshirë ministrin e mbrojtjes, Yoav Gallant, dhe ministrin e çështjeve strategjike, Ron Dermer, të cilët kishin qenë në kabinetin e luftës.

Shpërbërja e kabinetit të luftës nuk ka gjasa të ketë ndonjë ndikim domethënës në konflikt ku vendimmarrja do të kthehet në kabinetin e sigurisë.

Lëvizja duket të jetë një mospërfillje e qëllimshme ndaj aleatëve të ekstremit të djathtë të Netanyahut në koalicion, duke përfshirë ministrin e sigurisë kombëtare, Itamar Ben-Gvir, i cili kishte kërkuar një vend në kabinetin e luftës që nga largimi i Gantz-it, pasi u ankua se ai ishte përjashtuar për vendimet kryesore.

Raportet në mediat izraelite thonë se Netanyahu synon të marrë vendime të rëndësishme në takimet me këshilltarët e tij, duke përjashtuar Ben-Gvir, përpara se t'i paraqesë ato në kabinetin e sigurisë.