Marrëdhëniet Turqi-Siri, Erdogani thotë se do ta ftojë Assadin për bisedime

Presidenti i Turqisë, Rexhep Tajip Erdogan ka thënë të dielën se Turqia do t'i bëjë një ftesë presidentit sirian Bashar al-Assad "në çdo kohë" për bisedime të mundshme për të rivendosur marrëdhëniet midis dy fqinjëve.

"Ne do t'i bëjmë ftesën tonë (Asadit), me këtë ftesë, ne duam të rivendosim marrëdhëniet Turqi-Siri në të njëjtin nivel si në të kaluarën. Ftesa jonë mund të bëhet në çdo kohë”, ka deklaruar Erdogan, në një intervistë për mediat turke, raporton Reuters.

Turqia ndërpreu lidhjet me Sirinë në vitin 2011 pas shpërthimit të luftës civile siriane, në të cilën mbështeti rebelët që kërkonin të rrëzonin Assadin.

Ajo ka kryer disa operacione ushtarake ndërkufitare kundër militantëve që thotë se kërcënojnë sigurinë e saj kombëtare dhe ka formuar një "zonë të sigurt" në veri të Sirisë, ku trupat turke janë vendosur tani.

Duke folur me gazetarët gjatë fluturimit të tij nga Berlini, Erdogani ka thënë gjithashtu se Ankaraja do të kthente në mënyrë pozitive çdo hap pozitiv nga Damasku, dhe se presidenti rus Vladimir Putin dhe kryeministri i Irakut mund të kontribuojnë në lehtësimin e kontaktit.

“Tani kemi arritur në një pikë ku nëse Bashar Assad bën një hap drejt përmirësimit të marrëdhënieve me Turqinë, ne gjithashtu do të tregojmë atë qasje ndaj tij”, është shprehur Erdogan.

Erdogani në qershor nuk përjashtoi një takim të mundshëm me Assadin për të ringjallur marrëdhëniet.

Zyrtarët sirianë megjithatë kanë thënë vazhdimisht se çdo normalizim në marrëdhëniet mund të vijë vetëm pasi Turqia të pranojë të tërheqë mijëra trupa nga veriperëndimi i mbajtur nga rebelët.